“Azərbaycanın Xankəndi şəhərindəki erməni separatçıları son günlər vəziyyəti yenidən gərginləşdirməyə çalışırlar. Belə görünür ki, sülhməramlılar və onların komandanı da bu prosesdə hansısa formada iştirak edir, separatçıların təxribatlarına göz yumur və yaxud özləri belə istəyirlər. Ola bilsin ki, məqsəd Ukraynadakı məğlubiyyətdən diqqəti yayındırmaq cəhdidir. Bu, həm də bir mesajdır ki, başqa regionlarda da durumu gərginləşdirə bilərəm. Amma hesab edirəm ki, bunlar əbəsdir”. DİA.AZ xəbər verir ki, bu fikirləri Reyting.az-a Azərbaycan Demokrat Partiyasının (ADP) sədri Sərdar Cəlaloğlu deyib.

Onun sözlərinə görə, indi Rusiya beynəlxalq izolyasiya ilə üzləşib və dostlarına daha çox ehtiyacı var, bu səbəbdən də sülhməramlılar üzərinə düşən vəzifələri daha konkret həyata keçirməlidir.

S. Cəlaloğlu bildirib ki, Azərbaycan Ordusu ermənilərə qat-qat artıq cavab verməli, hər təxribatdan və fürsətdən istifadə edərək Xankəndi iqtisadi zonasını Azərbaycanın yuridiksiyasına qaytarmalıdır: “Bizim əsas işimiz bu olmalıdır. Məsələ ondadır ki, bizim cavablarımız erməni təxribatlarına nə dərəcədə adekvatdır. Şəxsən mənim fikrim belədir ki, separatçıların təxribatlarına on qat artıq cavab verməliyik. Onlar bizim gücümüzü görməli və bilməlidir ki, hansısa təxribatçı addımların cəzası çox ağır olacaq”.

Partiya sədrinin fikrincə, təxribatlarda Rusiyanın da maraqlı olması mümkündür: “Açığı, sülhməramlıların komandanı separatçılara tərəf çıxa, təxribatları qızışdıra bilər. Ümumiyyətlə, həmin adamın öz funksiyasından başqa hər işlə məşğul olduğu haqda məqalələr oxuyuram. Amma hesab edirəm ki, belə davranışlar Moskvadan gələn tapşırıqların nəticəsində də mümkündür”.

S. Cəlaloğlu diqqəti Paşinyanın Paris səfərinə yönəldərək əlavə edib ki, ermənilər hiyləgərdirlər: “Ermənilər görürlər ki, Ukrayna məsələsində ruslar uduza bilər. Ona görə də, Rusiya uduzacağı təqirdə özlərinə dayaq axtarırlar. Bu səbəbən də Paşinyan Parisə gedib. Bu xəyanat kimi qiymətləndirilə bilər. Amma ermənilər daha yaxşı arxa axtarırlar. Ruslarla strateji müttəfiqlik, KTMT-yə üzvülük məncə formal məsələdir. Erməni görəndə ki, Rusiya onun istədiyini vermir, başqa ağa axtaracaq. Bu da normaldır”.