“Azərbaycan və Ermənistan arasında sərhədlərin müəyyənləşdirilməsi zamanı 1923-cü ildən sonrakı xəritələrdən istifadə İrəvana sərf edir. Prezident Putin isə 1920-ci illərin xəritəsinin ifadəsinə vurğu edib. Çünki bu müddətdə Azərbaycanın bir sıra əraziləri, xüsusilə Zəngəzurun 9 kəndi, Laçın və Kəlbəcərin müəyyən əraziləri Ermənistanın nüfuz dairəsinə keçib. O cümlədən Qazax, Gədəbəy və Göyçədən. Bu səbəbdən də ermənilər çalışırlar ki, 1923-cü ildən sonrakı xəritələri gündəmə gətirsinlər”.

Bu fikirləri Reyting.az-a politoloq Cümşüd Nuriyev Ermənistan Təhlükəsizlik Şurasının katibi Armen Qriqoryanın sərhədlərin delimitasiyasına dair son açıqlamasını şərh edərkən deyib.

Xatırladaq ki, A. Qriqoryan Ermənistanın Azərbaycanla sərhədləri müəyyən etməyə hazır olduğunu deyib. Bildirib ki, Sovet İttifaqında sərhədlərin demarkasiyası 1925-26-cı illərdə başlayıb, 1929-cu ildə başa çatıb və sonradan hazırlanmış sovet xəritələri o dövrün xəritələrinə əsaslanır.

C. Nuriyev isə bildirir ki, erməni tərəfi yalan danışır: “Bundan əvvəl 1920-ci ilin xəritəsi var. Bu hərbi xəritə Azərbaycanda da, Ermənistan da mövcuddur. Amma Ermənistan mütəxəssisləri məhz 1923-cü ildən sonrakı xəritələri gündəmə gətirirlər. Niyə? Çünki delimitasiya zamanı 1920-ci illərdə çəkilən xəritə əsas götürülsə Azərbaycanın ərazisi min kvadrat kilometrə qədər artacaq. Bu səbəbdən də ermənilər deyirlər ki, 1923-cü ildən sonrakı dövrün xəritələri ilə razıyıq. Məncə, Azərbaycan buna razılıq verməməlidir. Putin də 1920-ci ilə işarə etdi. Çünki yaxşı bilir ki, o torpaqlar Ermənistana sonradan verilib. Bölgü belə aparılarsa, ən azı Zəngəzur dəhlizinin 20-25 kilometri Azərbaycan ərazisində qalır. Söhbət Nüvədi kəndindən gedir. Bundan sonra Zəngəzur dəhlizinə cəmi 14-15 kilometr qalır. Fikrimcə, 1920-ci ilin xəritəsi əsas kimi götürülsə Azərbaycan çox böyük işlər görə bilər”.

Politoloq diqqətə çatdırıb ki, Azərbaycan müəyyən güzəştlər etmək məcburiyyətindədir: “Çünki Ermənistan Azərbaycanın ərazi bütövlüyünü rəsmən tanıdıqdan sonra Qarabağ məsələsi gündəmdən çıxacaq. Uzağı oradakı ermənilərin yaşamasına şərait yaratmaq məsələsi meydana çıxa bilər. Məncə, ilk olaraq ərazi bütövlüyünün tanınması üzərində durmalıyıq. Bundan sonra Azərbaycan digər məsələləri də gündəmə gətirə bilər”.