Zəfər Günü ərəfəsində ölkəmizə qarşı hücumlar səngimək bilmir.

Təəssüflər olsun ki, xaricdə yaşayan azərbaycanlı blogerlər də ölkəmizə qarşı aparılan qarayaxma kampaniyasının alətinə çevrilib. Onsuzda ətrafımızda Azərbaycanın düşmənləri olduqca çox idi, lakin bunlara öz həmyerlilərimizində qatıldığını görmək həqiqətən çox pis bir haldır. Çünki bunun müxalifət olmaqla heç bir əlaqəsi yoxdur.

Ümumiyyətlə, iqtidara qarşı müxalif ola bilərsən, amma ölkəyə və millətə qarşı olmaq qəbuledilməz bir davranışdır. Nəzərə almaq lazımdır ki, Qarabağın işğaldan azad edilməsini bütün Azərbaycan xalqı illərdir ki, istəyirdi. Keçən il 44 gün boyunca tarix yazdığımız dönəmdə hər kəs bir yumruq kimi Ali Baş Komandan İlham Əliyevin ətrafında toplandı.

Qəhrəman oğullarımız torpaqları düşmən işğalından azad etmək üçün canlarından keçdi. İndi isə Zəfər Gününə kölgə salmağa çalışmaq, məhz 3 minə yaxın şəhidimizin ruhuna qarşı ən böyük təhqirdir. Azərbaycan ordusu erməniləri məğlub edərək Qarabağı geri aldı. Lakin görünür başqa qüvvələrin təsiri altında olanlar bunu həzm edə bilmir.

Maraqlıdır, xaricdə Azərbaycana qarşı çıxan blogerləri meydana kim atıb? Onların əsas məqsədi nədir?

Böyük Azərbaycan Partiyasının (BAP) sədri Elşad Musayev Cebhe.info-ya açıqlamasında bildirib ki, Azərbaycanın tarixi zəfərinə kölgə salmağa çalışan satqın insanlar meydana çıxıb:

“Uzun müddətdir ki, dünya dövlətləri Azərbaycana qarşı ikili standart nümayiş etdirir. Hətta onlar çalışırdılar ki, Qarabağı Ermənistan ərazisi elan etsinlər. Lakin qüdrətli Azərbaycan xalqı və dövləti bununla razılaşmadı və 44 günlük müharibə nəticəsində torpaqlarımızı işğaldan azad etdi.Bunun nəticəsində Ermənistan və onun arxasında dayanan qüvvələr ağır məğlubiyyətə uğradı. Belə olan halda xaricdə Azərbaycanın uğurlarına kölgə salmağa çalışan qüvvələr ortaya çıxdı. Təəssüf ki, onlar bizim daxilimizdə olan xain və satqınlardan istifadə edirlər. Ümumiyyətlə, bu bütün dünyada hər zaman belə olur.

Hesab edirəm ki, hakimiyyətə qarşı müxalifət olmaq, iqtidarı tənqid etmək və ya səhvləri demək olar, amma qazandığımız möhtəşəm qələbəyə kölgə salmağa çalışmaq vətənə xəyanətdir. Düşünürəm ki, bu da bir mərhələdir və bunu keçmək lazımdır. Bu insanlar əsasən, ermənipərəst qüvvələr tərəfindən istifadə olunur. Azərbaycanı və türk dünyasını zəif görmək istəyən qüvvələr tərəfindən bu insanlar hərəkətə gəririrlər. Bəzi insanlar pul qarşılığında satılaraq, özlərini hakimiyyətə müxalifət hesab edirlər. Lakin müxalifətçilik dövlətin və millətin zəfərinə kölgə salmaq deyil”.