“Ermənistanın Sünikdə (Zəngəzur) bir aviabaza qurmaq üçün İrana təklif etdiyi barədə məlumatlar var. Bölgə Naxçıvanı və bununla da Türkiyəni Azərbaycanın qalan hissəsinə və Xəzərə birləşdirəcəyi proqnozlaşdırılan Zəngəzur dəhlizinin keçəcəyi yerdir. 2020 -ci ilin noyabrında imzalanan atəşkəsdən sonra Laçın dəhlizinə cavab olaraq formalaşdığı bildirilən Zəngəzur dəhlizi ilə bağlı Rusiyanın təşəbbüsü olub. Ancaq Moskva indiyədək bu istiqamətdə müsbət bir addım atmamış və Azərbaycan Ordusunun bölgədəki sərhəd kəşfiyyat fəaliyyətini izləmək üçün bir çox kiçik hərbi keçid məntəqələri yaratmışdır”.

Moderator.az xəbər verir ki, bu fikirləri türkiyəli analitik Göktürk Tuysuzoğlu Ankarada fəaliyyət göstərən Qafqaz Strateji Araşdırmalar Mərkəzinin saytındakı yazısında ifadə edib.

“Naxçıvanı ölkənin qalan hissəsinə birləşdirmək üçün İrandan asılılıqdan xilas edəcək yeganə yol Zəngəzur dəhlizinin açılması olacaq. Rusiya İranla müəyyən bir razılaşma halında görünür. Ancaq eyni zamanda Moskvanın bu istiqamətdə İranı nə qədər dəstəkləyəcəyi və ya Tehranın bölgədə bu qədər böyük rol oynamasına nə vaxta qədər icazə verəcəyi də maraq doğurur. Bu baza açılsa belə, Rusiyanın icazəsi və nəzarəti altında və Moskvanın atəşkəs qarantı mövqeyinə xələl gətirmədən Ermənistanı dəstəkləmək cəhdini aktivləşdirmək üçün istifadə oluna bilər. Son zamanlar İran və Azərbaycan arasındakı sərhəd gərginliyi və hərbi eskalasiyanı nəzərə alsaq, İrəvanın bu vəziyyətdən istifadə etmək istəyini başa düşmək olar. Təbii ki, bu prosesdə Rusiyanın bəyanatları izlənilməlidir”- deyə Türkiyə siyasi analitiki yazır.

Xatırladaq ki, İranın Ermənistanda bir hərbi baza qurmaq niyyəti haqda informasiyalar hələ 2017-ci ildə İsrailin o vaxtkı baş naziri Binyamin Netanyahunun Ermənistan xarici işlər naziri Edvard Nalbanyanı öz dəftərxanasında qəbul edərək İranın regionda, yəni Ermənistanda hərbi mövcudluq cəhdlərindən və bunun səbəb olacağı mənfi nəticələrdən narahatlığını bildirdikdən sonra yayılmışdı...