Köhnə vərdişinə uyğun olaraq, özünü olmayan Azərbaycan Kommunist partiyasının (AKP) lideri kimi qələmə verməyə çalışan Rauf Qurbanov özünün növbəti təmtaraqlı yalanları və KİV-in dəstəyi ilə gündəmə gəlməyə cəhd göstərib. Belə ki, “Exo” qəzetinin 4 oktyabr 2015-ci il nömrəsində (http://www.echo.az/article.php?aid=90101) o, qeyd edir ki, rəhbərlik etdiyi "partiya" 50 nəfər namizədlə seçkilərdə iştirak edəcək.
Sual olunur - 50 nəfər partiya üzvü olmadığı halda bu "qəhrəman" 50 nəfər namizədlə necə və hansı formada seçkilərdə iştirak edəcək? Qurbanov 2010-cu ildə keçirilən seçkilərdə də 60 nəfər namizədlə iştirakını bəyan etsə də, nəticədə 4 namizəd seçki kampaniyasında iştirak etdi. Niyə 60 yox, 4 nəfər sualına Qurbanov namizədlərə hakimiyyət tərəfindən müxtəlif təzyiqlərin olduğunu deyərək, reallıqdan uzaq və məsuliyyətsiz bir cavabla yaxasını kənara çəkməyə çalışdı. Bizə isə vəziyyət aydın idi. Partiyada partiyalılıq qalmamışdı ki, o sayda namizədlə seçkilərə qatılsın. Sadəcə bu, Qurbanovun cəmiyyətin diqqətini cəlb etmək üçün bir manevrindən başqa heç nə deyildi. Reallıq isə tamam başqa idi.
İndi də o, yenidən həmən yalanlarını KİV-də təzələyir. Yazıda o, qeyd edir ki "partiyadan"qovulanlar da seçkilərdə iştirak etmək istəyirlər. Amma onlar partiyanın adından istifadə edə bilməzlər”. Qəribə bir məntiqdir! Bu cənab başını tamam itirib! Yoxsa belə məsuliyyətsiz danışmazdı. Özünüzə gəlin! Məgər Siz partiya siyahısı ilə seçkilərə gedirsiniz? Məgər Sizin Ədlyyə Nazirliyində qeydiyyatınız var?
Keçən seçkilər Sizə dərs olmadı. MSK-nın AKP adından təqdim etdiyiniz sənədləri saxta olduğüna görə ləğv etdiyi nə tez yadınızdan çıxıb! Yoxsa “Səadət” şirkətində hazırlatdığınız möhürdən bu dəfə də istifadə etmək istəyirsiniz? Belə olan halda Siz hansı partiyadan danışırsınız? Sizin belə danışmağa mənəvi haqqınız çatırmı? Bu, aşkar saxtakarlıq deyilmi?
Bəyan edirsiniz ki, 400 nəfərlə qurultay keçirəcəksiniz. İndi hansı təşkilatların işçilərinin siyahılarını özlərinin də xəbəri olmadan “qurultay” iştirakçısı edəcəksiniz? Kimlərəsə sığınıb onların himayəsi ilə hərəkət etməyə adət etmisiniz. Onu demək istəyirəm ki, Azərbaycanda Sizin kimilərinin sayəsində bu gün AKP adlı bir partiya reallıqda yoxdur! Amma çoxlu sayda əqidəli kommunistlər var! Onlarsa Sizin kimilərini qəbul etmirlər!
--
Gülnisə Məhsimova