63 saylı Sabirabad birinci seçki dairəsindən deputatlığa namizəd Pənah Hüseyn hazırda Sabirabad rayonunda seçiciləri ilə görüş keçirir.

Musavat.com-un Sabirabad rayonuna ezam olunmuş reportyorunun verdiyi məlumata görə, Pənah Hüseyn hazırda rayonun Qruzma kəndində seçicilərinə səslənir.

Görüş keçirilən stadionda izdiham yaşanır. Yüzlərlə kənd sakini P.Hüseynlə görüşə gəlib. Pənah Hüseyn tribunada çıxış edərək deyib:

"Mən bu məktəbdə oxumuşam, təhsil almışam. Sonuncu dəfə də seçicilərimlə görüşə bu kənddən başlamışdım, indi də buradayıq. 63 saylı Sabirabad birinci seçki dairəsindən deputatlığa namizədliyimi irəli sürmüşəm. Rəqiblərimə də uğurlar arzu edirəm. Ümid edirəm ki, buradan həqiqətən səs toplayan şəxs deputat olacaq.

Buradan hər kəsə səslənirəm. Əgər mənə etimad göstərilərsə, deputat seçilərəmsə, təkcə Sabirabad rayonunun, müxalifətin yox, hər kəsin deputatı olacağıma söz verirəm.

Bəzən mənə deyirlər ki, Pənah bəy, sən 2005-ci və 2010-cu illərdə deputat olmuşdun. Həmin illərdə nə etmisən ki, indi yenə səs gözləyirsən?

Mən bu suala cavab verirəm. Deputat olduğum zamanlarda Milli Məclisə 11 ədəd qanun layihəsi hazırlayıb, təqdim etmişəm. Sadəcə 5 il ərzində mənə 5 mindən yuxarı müraciət göndərilib. Onların böyük hissəsinə cavab vermişik. Müxtəlif rayonlardan, kəndlərdən kommunal problemlərlə bağlı şikayətlər gəlib. Onlara da əlimdən gələn yardımı etmişəm.

Biz istədiklərimizin, arzuladıqlarımızın 10 fazini belə həyata keçirə bilmədik. Çünki mən hakimiyyətin deputatı deyildim, vəzifədə də deyildim. Mən deputat olduğum zamanlarda rayonun yollarına asfalt çəkilməsi üçün prezident İlham Əliyevə müraciət etmişəm. Və bu mənim İlham Əliyevə yeganə müraciətim olub. Hansı ki, bir müddət sonra bu kəndin yolluna asfalt çəkildi.
Mən tam cəsarətimlə deyirəm ki, bir deputat 2005-ci və 2010-cu illərdə nə edə bilərdisə, mən ondan artığına da çalışmışam. Və yenə də söz verirəm ki, Sabirabad camaatı mənə etimad göstərərsə, mən bütün gücümlə sizin üçün çalışacağam".
Daha sonra Pənah Hüseyn özünün seçki platformasından bəhs edib: "Platformada milli birlik, demokratiya, sosial rifah kimi bəndlər yer alır".
Deputatlığa namizəd bu görüşdən sonra rayonun digər kəndlərinə üz tutub. İlk olaraq Surra kəndində olan Pənah Hüseyn burada da kənd camaatı tərəfindən yaxşı qarşılanıb. O öz seçicilərinə səslənərək, onlardan noyabrın 1-də ona səs verərək, etimad göstərmələrini istəyib.
Pənah Hüseynin görüşləri bununla bitməyib. O, ümumulikdə rayonun 4 kəndində görüş keçirib. Bunlar Quruzma, Surra, Axıska, Kovlar kəndləri olub. Görüşlər zamanı heç bir əngəl törədilməyib. Görüşlər öncədən təyin edilən yerlərdə, sakit şəkildə keçirilib. Dörd kənddə Pənah Hüseynlə görüşə gələnlərin sayı 500-700 nəfər olub.
Qeyd edək ki, bu görüşlər önəmli bir nüansla da yadda qalıb. Belə ki, bu günə kimi ölkə ərazisində açıq havada seçicilərlə görüş keçirən namizəd olmayıb. P.Hüseyn bunu ilk edən namizəd olub.