Bu dəfə şəxsiyyətəpərəstişin qurbanı Milli Şura sədri olacaq

Zaman keçdikcə Əli Kərimlinin qurultay adlandırdığı toplantı-şounun gizli məqamları üzə çıxır. Redaksiyamıza həmin toplantıda və ondan sonra baş vermiş olaylarla bağlı maraqlı məlumatlar daxil olub. Milli Şura rəhbərliyinə daxil olan və məlum səbəblərdən adının çəkilməsini istəməyən mənbənin sözlərinə görə, qurultaydan sonra Əli Kərimli və Cəmil Həsənli arasında ciddi gərginlik yaşanıb. Mənbə bu gərginliklə bağlı detalları açıqlayıb: “Qurultaya qədər Milli Şuranın Koordinasiya Mərkəzinin toplantılarında və qeyri-rəsmi yığıncaqlarımızda Əli Kərimli bir neçə dəfə yarızarafat “Cəmil müəllim bu qurultaya sürpriz hazırlayıb” deyirdi. Düzü, bunun konkret nə olduğunu bilmirdik. Ancaq qurultaya bir neçə gün qalmış Milli Şuranın Koordinasiya Mərkəzinin çox dar çərçivədə üzvləri arasında məsələ açıldı və məlum oldu ki, Əli Kərimli Cəmil Həsənlidən AXCP-yə qayıtmasını istəyib. Üzbəüz “yox” cavabı verməkdən çəkinən Cəmil müəllim “Milli Şura sədrinin hansısa partiya üzvü olması düzgün qarşılanmaz” formasında bu məsələni müzakirəyə çıxarıb. Biz çoxumuz da bu fikrin doğru olduğunu bildirdik. Belə bir situasiyaya hazır olmayan Əli Kərimli “Mən bu məsələni Cəmil müəllimə zarafatla demişəm, o, onsuz da ruhən cəbhəçidir”, deyərək mövzunu bağladı. Ancaq hamı hiss etdi ki, Kərimli pərt olub. Yəni, doğrudan Cəmil müəllimə belə bir təklif olunduğu və rədd cavabının gözlənilmədiyi sezilirdi”. Mənbənin sözlərinə görə Kərimli-Həsənli münasibətlərindəki gərginlik qurultay adlandırılan toplantıda pik həddə çatıb. Buna səbəb isə tarixçi professorun hüquqşünas siyasətçinin əsəblərinə toxunan hərəkətləri və çıxışı olub. Mənbə bununla bağlı deyir: “Kərimli daxilən şəxsi diktatura və alternativsiz pərəstişə meyilli adamdır. Həmin tədbirdə Əli Kərimli zala daxil olarkən birinci cərgənin ayağa qalxmaması onu xeyli əsəbiləşdirib. Həmin şəxslər qonaqlar olsa da, bu az sayda qonaqlara Kərimli Milli Şurada öz kölgəsi altında saxladığı şəxslər kimi baxır və Cəmil Həsənlinin ayağa qalxması kifayət edərdi ki, bu adamlar da Kərimlini alqışla qarşılasınlar. Amma Milli Şura sədri nəinki bunu etmədi, hətta zala daxil olan Kərimli ilə yerindən qalxmadan görüşdü”. Mənbəmiz bildirir ki, Həsənlinin bu davranışları Kərimli tərəfindən narazılıqla qarşılanıb. Bütün bunlar azmış kimi Cəmil Həsənli öz çıxışında da lazımsız məqamlara toxunub, xüsusilə onun sosial şəbəkə ilə bağlı dedikləri Əli Kərəmlinin narazılığına səbəb olub”. Aydınlıq olsun deyə Cəmil Həsənlinin həmin toplantıda etdiyi çıxışdan sözügedən hissəni diqqətinizə çatdırırıq: “Bəzən dostlar cəbhəçi gənclərin sosial şəbəkələrdə aktivliyindən şikayət edir, onların fəaliyyətini bir kampaniya kimi qəbul edirlər. Mən əminliklə deyirəm ki, bu, kampaniya deyil, cəbhəçi gənclərin həyat mövqeyidir. Cəbhəçilər çağdaş dövrün, zəmanənin mühüm bir hissəsi olan sosial şəbəkələrdə də bu üstünlüyü əldə etmişlər. Bu, onların çox böyük uğurudur”. Nəzərə alsaq ki, Əli Kərimli bütün çıxışını ona ünvanlanan “müxalifətçilik facebook likelərindən kənara çıxmır” ittihamına cavab üzərində qurmuşdu, Cəmil müəllimin sosial şəbəkə fəaliyyətinin cəbhəçi gənclər üçün həyat tərzinə çevrilməsini etiraf etməsinin necə reaksiya doğurduğunu təsəvvür etmək olar. Mənbəmiz bütün bu baş verənlərin Kərimli-Həsənli arasında “soyuq müharibə”nin əsasını qoyduğunu bildirir. Onun sözlərinə görə, hətta bu yaxınlarda Əli Kərimli öz yaxın çevrəsi ilə söhbət zamanı Cəmil Həsənli və Milli Şuranı nəzərdə tutaraq “Bu qocanın kitabını bağlamaq vaxtı çatıb” deyib.

Cebhe.info