“Milli Məclisin buraxılaraq yenidən növbədənkənar parlament seçkilərinin keçirilməsi tamamilə qanunauyğundur və konstitusiyanın tələblərinə cavab verir. Oan görə də bəzi müxalif düşərgənin səsləndirdiyi fikirlər yanlışdır. Görünür bu adamların konstitusiyadan xəbərləri yoxdur”.
Bunu “Ölkə.Az”a açıqlamasında millət vəkili Azay Quliyev deyib.

Onun sözlərinə görə, konstitusiyada hansı hallarda parlamentin buraxılması təsbit olunub və parlamentdə çoxluq təşkil edən hakim Yeni Azərbaycan Partiyası da konstitusiyanın tələblərindən irəli gələn müddəalara əsaslanaraq belə bir qərar verib. “Belə ki, parlamentdə çoxluq təşkil edən qrup konstitusiyanın tələbinə uyğun olaraq mandatlarından imtina edib istefa verirlər. Belə olan halda parlamentin fəaliyyət göstərə bilmədiyindən növbədənkənar parlament seçkiləri keçirilməlidir. YAP-ın bu qərarına parlamentdə təmsil olunan müstəqil deputatlar da dəstək veriblər. Demək olar ki, yekdilliklə hamı parlamentin buraxılmasının tərafdarı olduğundan, növbədənkənar seçkilərin keçirilməsi üçün tam hüquqi əsas var”- millət vəkili qeyd edib.
Müxalifətin səsləndirdiyi digər fikirlərə gəldikdə isə A.Quliyev deyib ki, burada təəccüblü heç nə yoxdur: “Biz artıq marginallaşmış həmin qrupun nə deyəcəyinə alışmışıq: “Marginallaşan bu qrupun fəaliyyəti ancaq Azərbaycan Prezidenti və hakimiyyətinin yürütdüyü siyasətdən, islahatların keçirilməsindən asılı olmayaraq bütün görülən işlərə qarşı qarayaxma kampaniyası aparmaqdır. Onların fəaliyyəti inkarçılıq üzərində qurulub. Odur ki, onlara əhəmiyyət verməyə dəyməz”.

Millət vəkili maqginallaşan müxalif qüvvələrin belə bir mövqe sərgilməsinin digər bir səbəbini izah edərək deyib ki, bu dəstə Azərbaycan Prezidentinin yürütdüyü çevik siyasət və qəbul etdiyi ciddi qərarlar onlar üçün gözlənilməz olduğundan seytnot vəziyyətə düşürlər: “Bu hər zaman belə olub. Onların ölkə başçısının yürütdüyü siyasəti və taktiki gedişatını əxz etmək üçün bilik və bacarıqları yoxdur. Buna korazehinlik deyərlər. Ona görə də fəaliyyətlərini dövrün tələbinə uyğun formada qura bilmirlər. Əksinə seçkilər hər bir syasi partiya üçün əlavə bir imkandır və bundan maksimum faydalanmalıdır.Ancaq bunlar hazır olmadıqlarından öz uğursuzluqlarını bu yolla sığortalayırlar. Onlar seçki vaxtında da keçirilsəydi bu, fikirləri səsləndirəcəkdilər. Odur ki, əhəmiyyət verməyə dəyməz”.