Milli Məclisin noyabrın 29-na keçiriləcək plenar iclasının gündəliyi müəyyən olunub. Gündəliyə 22 məsələ daxil edilib.
Parlamentin sabah keçiriləcək iclasının 12-ci məsələsi Azərbaycan Respublikasının İnsan hüquqları üzrə müvəkkilinin (Ombudsmanın) seçilməsi olacaq. Yeni Ombudsman postuna üç nəfərin namizədliyi irəli sürülüb. Onlar Bakı Apellyasiya Məhkəməsinin sədr müavini Kəmalə Abiyeva, Ali Məhkəmənin İnsan Hüquqları və İctimaiyyətlə Əlaqələr Şöbəsinin müdiri Kəmalə Əliyeva və Konstitusiya Məhkəməsi Aparat rəhbərinin müavini Səbinə Əliyevadır.

Deputatlar irəli sürülən namizədləri müzakirə edərək onlardan birini yeni Ombudsman seçəcək.

Namizədlər içərisində ən şanslı namizəd kimi Konstitusiya Məhkəməsi Aparat rəhbərinin müavini Səbinə Əliyevanın adı hallanır. S.Əliyeva YAP İcra katibinin müavini, Milli Məclisin İctimai birliklər və dini qurumlar komitəsinin sədri Siyavuş Novruzovun həyat yoldaşıdır.
Deputatlar eyni zamanda 2020-ci il dövlət büdcə zərfinə daxil sənədlər paketi üçüncü oxunuşda müzakirə olunacaq.

Deputatlar həmçinin məhkəmə-hüquq sistemində islahatlar paketini nəzərdə tutuan qanunlar toplusunu müzakirə edəcəklər. İclasda həmçinin “Lisenziyalar və icazələr haqqında” və “Tibbi sığorta haqqında” qanunlara dəyişiklikləri müzakirə edəcəklər.