“Azərbaycan ailəsi dünyada özünəməxsusluğu ilə seçilir. Bizim qədimdən gələn ailə modelimiz var”.
“Ölkə.Az” xəbər verir ki, bunu Milli Məclisin Hüquq siyasəti və dövlət quruculuğu komitəsin in sədr müavini Məlahət İbrahimqızı YAP partiyanın Qadınlar Şurasının təşkilatçılığı ilə “Ailə və cəmiyyət: ənənə və məsuliyyət” mövzusunda keçirilən konfransında çıxışı zamanı deyib.

Millət vəkili Məlahət İbrahimqızı bildirib ki, ailə xalqımızın əsas dəyərləri sırasındadır və bu gün ölkəmizdə ailə institutunun qorunması prioritet məsələlərdəndir:

“Tarixin hər bir mərhələsində ailə cəmiyyətin inkişafında mühüm rol oynayıb. Cəmiyyətin inkişafı ailənin rifahından, ailədaxili sağlam mənəvi mühitdən, ailə münasibətlərinin yüksək əxlaqi dəyərlər əsasında təşkilindən çox asılıdır. Buna görə də cəmiyyət həmişə ailənin möhkəm bünövrə əsasında qurulmasına, inkişafına çalışır. Azərbaycan ailəsi dünyada özünəməxsusluğu ilə seçilir. Bizim qədimdən gələn ailə modelimiz var”.

O əlavə edib ki, ölkəmizdə gender bərabərliyi haqqında mükəmməl qanunvericilik bazası yaradılıb, lakin mütəmadi aparılan maarifləndirmə işlərinə baxmayaraq, hələ də məişət zorakılığı hallarına rast gəlinir. O, son vaxtlar AXCP rəhbərliyində təmsil olunan bir şəxsin öz həyat yoldaşına və qızına qarşı törətdiyi zorakılğın cəmiyyətdə ciddi etirazla qarşılandığını və pislənildiyini diqqətə çatdırıb. M.İbrahimqızı bildirib ki, hakimiyyətə gəlmək iddiasında olan bir şəxs ailəsində qadınlara işgəncə verirsə, belə adamlar vəzifəyə gəlsə, qadınlara daha çox şiddət göstərər. M.İbrahimqızı vurğulayıb ki, belə şəxslər vəzifəyə gələ bilməzlər: “Avropa ölkələrində hər hansı şəxsi vəzifəyə təyin edərkən onun qadınlara münasibəti də nəzərə alınır. Əgər həmin şəxs qadınlara qarşı pis münasibət göstərirsə, onu qabağa çəkmirlər”.

Millət vəkili bildirib ki, AXCP bu hərəkətə görə Azərbaycan qadınlarından üzr istəməlidir:
“Bu hərəkət Azərbaycan qadınlarının adına bütün dünyada mənfi təsir göstərir. Ona görə də, partiya Azərbaycan qadınlarından üzr istəməlidir”.
Tədbirdə çıxış edən Azəri-Türk Qadınlar Birliyinin sədri Tənzilə Rüstəmxanlı çıxışında bu hadisənin gündəmin əsas mövzularından olduğunu deyib.
Onun sözlərinə görə, buna səbəb hakimiyyətə iddia edən bir siyasi partiyanın rəhbərliyində olmuş şəxsin öz ailə üzvlərinə qarşı zorakı hərəkətləridir. Bu səbəbdən də, həmin hadisə cəmiyyətdə ciddi qınaq obyektinə çevrilib.

Tədbirdə digər çıxış edənlər də qeyd ediblər ki, Azərbaycan cəmiyyətində qadına hörmət təməl dəyərlərdən biridir. Qadınlara qarşı hər bir zorakılıq halı, o cümlədən məişət zorakılığı cəmiyyətimiz tərəfindən həmişə mənfi qarşılanıb. Bütün zorakılıq hallarının aradan qaldırılması, eləcə də qadınların öz hüququnu bilməsi vacib məsələdir.
Sonda konfransda iştirak edən 8 siyasi partiyanın qadın təşkilatlarının rəhbərləri və 30 qeyri-hökumət təşkilatı sədrlərinin adından müraciət qəbul olunub.

Müraciətdə bir daha AXCP rəhbərliyində təmsil olunmuş Fuad Qəhrəmanlının öz həyat yoldaşına və qızına qarşı zorakılıq hərəkətləri qətiyyətlə pislənilib. Müraciətdə həmçinin müəyyən insan hüquq müdafiə təşkilatlarının bu məsələdə susqunluğu da pislənilib. Bu da qeyd olunur ki, həmin xoşagəlməz hadisə əvvəlcədən partiya rəhbərliyinə də məlum olub, bununla belə zorakılğın qarşısını almaq üçün heç bir tədbir görülməyib. Ona görə də, AXCP rəhbərliyi tam tərkibdə istefa verməli və Azərbaycan qadınlarından üzr istəməlidir.

Müraciətdə məlum zorakılıq hadisələri bir cinayət kimi qimətləndirilib və hüquq-mühafizə orqanlarına bu hadisənin ciddi şəkildə araşdırılması və qanun çərçivəsində müvafiq addımların atılması üçün çağırış edilib.