"Paşinyanın “Qarabağ Ermənistan ərazisidir” deməsi və digər rəsmilərin də bunu dəstəkləməsi Ermənistanın işğal siyasətinin təzahürüdür".
Bunu açıqlamasında millət vəkili Asim Mollazadə deyib.

Onun sözlərinə görə, Paşinyanın bu sözləri əslində onun göstərir ki, Ermənistanın Azərbaycana ərazi iddiaları var və ona görə də beynəlxalq hüquq normalarını kobud surətdə pozaraq, Azərbaycanın böyük bir ərazisini işğal edib. “Ermənistan işğal siyasətinə son vermək istəmədiyindən BMT Təhlükəsizlik Şurasının qəbul etdiyi qətnamələrini də icra etmək istəmir. Ermənistan işğalçı ölkədir və Paşinyan da bunu açıq etiraf edib”-A.Mollazadə deyib.
İrəvan belə bir fikir səsləndirməsinin danışıqlar prosesinə təsirinə gəldikdə isə deputat bildirib ki, belə olan vəziyyətdə beynəlxalq təşkilatlar mövqelərini ortaya qoymalıdır: “Paşinyan əslində, bu fikirləri səsləndirməklə danışıqlar prosesini pozmaq istəyir. Çünki Ermənistan danışıqlara hazır deyil və öz işğalçı siyasətinə son qoymaq istəmir. Bu da bölgədə çox ciddi təhlükəli vəziyyət yaradır. Odur ki, istər ATƏT MQ-nin həmsədr ölkələri, istər ümumilikdə ATƏT və digər beynəlxalq təşkilatlar öz mövqelərini bildirməlidirlər. İşğalçıya qarşı müvafiq beynəlxalq sanksiyalar tətbiq edilməlidirlər”.

Belə olan şəraitdə Azərbaycanın hansı addımları atmalıdır fikrinə gəldikdə, A.Mollazadə deyib ki, Azərbaycan beynəlxalq təşkilatlardan işğalçı Ermənistanla bağlı konkret qərarların qəbul edilməsini və addımlar atılmasını tələb etməlidir: “Azərbaycan beynəlxalq təşkilatların atacağı addımlara uyğun öz siyasətini müəyyənləşdirməlidir”.