"Dağlıq Qarabağ münaqişəsinin həlli yolu olsa da, həll edilmir".

APA-nın məlumatına görə, bu gün baş nazirin müavini, Qaçqınların və Köçkünlərin İşləri üzrə Dövlət Komitəsinin sədri Əli Həsənov ATƏT-in Minsk Qrupunun həmsədrləri Ceyms Uorlik (ABŞ), İqor Popov (Rusiya) və Pyer Endryu (Fransa) ilə görüşdə deyib.
Ə. Həsənov bildirib ki, Azərbaycan beynəlxalq aləmdə üzərinə düşən öhdəliklərə əməl edir, böyük tədbirlər keçirilir: "Bunların sonuncusu I Avropa Oyunlarıdır. O cümlədən Azərbaycan dinlərarası, mədəniyyətlərarası dialoqa mühüm töhfə verir. Bəs nə üçün Azərbaycana münasibət soyuqdur? Bizi narahat edən odur. Biz dünya üçün açığıq, sərhədlərimizi dünya üçün açıq elan etmişik. Avropa dəyərlərini əsas götürmüşük. Nə üçün bizə münasibət belədir, nə üçün 1 milyondan çox insanımız qaçqın və məcburi köçkün həyatı yaşamalıdır? Bəs onların hüquqları tapdanmır? Nə üçün bir dövlət səsini qaldırmır? Bunları deməklə mühazirə oxumaq fikrində deyiləm, içimdən gələn fikirlərdir".
Ə. Həsənov bildirib ki, doğulduğu kənd işğal altındadır, 50 ildir, Sumqayıtda yaşayır: �Bu Komitənin işçilərinin çoxu məcburi köçkündür. Bir gün bizə deyə bilərlər ki, nə qədər gözləməliyik? Bu gün Siz bir qəsəbəyə səfər etdiniz, son illər Neft Fondunun hesabına 90 belə qəsəbə tikilib, 240 min qaçqın və məcburi köçkünü ora köçürmüşük, daha 380 min nəfər üçün belə qəsəbələrə ehtiyac var. 380 min qaçqın və məcburi köçkün yataqxanalarda yaşayır. Son 6 ildə Azərbaycan hökuməti hər il qaçqın və məcburi köçkünlər üçün 780 milyon dollar vəsait sərf edir. Son 20 ildə onların sosial problemlərinin həlli üçün 20 milyard dollar sərf edilib. Bu gün dünyada hər bir qaçqın və məcburi köçkünə sərf olunan ən yüksək vəsait Azərbaycandadır. Ona görə də BMT-nin Qaçqınlar üzrə Ali Komissarlığı 2012-ci ildə Azərbaycanı üzv seçib. Beynəlxalq tədbirlərdə də qeyd edilir ki, Azərbaycan hökumətinin qaçqın və məcburi köçkünlər üçün gördüyü işlər nümunədir. Bəzən bizə deyirlər ki, qaçqın və məcburi köçkünlərin hüquqlarını pozub, onları kompakt yerləşdirirsiniz. Mən də demişəm ki, sadəcə, sizin onların idarə edilməsindən xəbəriniz yoxdur, onların hüquqlarını heç vaxt pozmamışıq. Dünyada miqrasiyanın həddi 5 faizə qədərdir, ancaq Azərbaycana məcuri köçkünlərin daxili miqrasiyası 7 faizdir. Onlar kompakt şəkildə yaşadıqları üçün torpaqlarına geri qayıdan zaman bu proses daha rahat olacaq".