Elmar Məmmədyarov Ukrayna Dövlət Fiskal Xidmətinin rəisi Roman Nəsirov ilə görüşüb

Xarici işlər naziri Elmar Məmmədyarov Ukrayna Dövlət Fiskal Xidmətinin rəisi Roman Nəsirov ilə görüşüb.

XİN-nin mətbuat xidmətindən ANS PRESS-ə bildirilib ki, Azərbaycanda olmasından məmnunluğunu bildirən R.Nəsirov Birinci Avropa Oyunlarının keçirilməsi münasibətilə ölkəmizi təbrik etdi və xeyli sayda ukraynalı idmançının yarışlarda iştirak etdiyini diqqətə çatdırıb, eləcə də Ukraynada cərəyan edən hadisələr ilə bağlı qısa məlumat verdi.

E.Məmmədyarov ukraynalı idmançıların oyunlar zamanı uğurla çıxış edəcəyinə ümidvar olduğunu bildirib.

Nazir Ermənistan-Azərbaycan Dağlıq Qarabağ münaqişəsinin həlli istiqamətində aparılan danışıqlar barədə məlumat verərək münaqişənin beynəlxalq hüququn norma və prinsiplərinə, xüsusilə beynəlxalq səviyyədə tanınmış sərhədlərə və dövlətlərin ərazi bütövlüyünə və suverenliyinə hörmət çərçivəsində həll olunmasının vacibliyini söyləyib.

Görüşdə qarşılıqlı maraq doğuran məsələlər ətrafında fikir mübadiləsi aparılıb.