Mən də mayın 29-da keçirilən "Arsenal” – "Çelsi” qarşılaşmasında hansısa komandaya azarkeşlik etmək üçün deyil, həmin yarışı bir futbol bayramı kimi görmək üçün Olimpiya Stadionuna getmişdim.
Bunu açıqlamasında millət vəkili Aydın Mirzəzadə deyib.

Onun sözlərinə görə, komandalardan hansının qalib gəlməsi onun üçün əhəmiyyətli deyildi.

“Orada gözəl bir oyuna, Avropa futbol mədəniyyətinə, futbolun yaxşı mənada təbliğinə şahidlik etdim. Eyni zamanda dünənki yarışda stadionda on minlərlə xarici turist gördüm. Müxtəlif ölkələrin bayraqları dalğalanır, xarici dillərdə mahnılar oxunur, danışılırdı. Əlil arabasında xaricdən Azərbaycana məhz bu yarışı izləmək üçün gələn azarkeşi, turisti, həmçinin yaşlı bir ingilis qadınının oyunu böyük həyəcanla izlədiyini gördüm”, - deyə millət vəkili bildirib.

Millət vəkili deyib ki, təşkilatçılıq işləri bütün parametrlər üzrə ən yüksək səviyyədə olub:
“Oyunun təşkili yüksək səviyyədə idi. Təhlükəsizlik qaydaları da tam normal idi. Tamaşaçılar öz yerlərini tapana qədər onlara könüllülərdən ibarət böyük bir dəstənin xidmət göstərməsi yüksək səviyyədə idi. Düşünürəm ki, belə bir fonda böyük maraq və həyəcanla izlənilən, ədalətli bir oyun keçdi. "Çelsi”nin qələbəsi onun haqqı idi. Həm oyuna qədər, həm də oyundan sonra çoxminli tamaşaçıların nəqliyyatla stadiona və ya əksinə stadiondan metroya qədər daşınması, mənzil başına çatdırılması da yüksək səviyyədə təşkil edilmişdi. Mən özüm Qara Qarayev metrostansiyasından stadiona və oyun qurtarandan sonra geriyə - evə gəldim. Metropolitenin işi də yüksək səviyyədə idi, bütün əməkdaşlar sərnişinlərə xidmət etmək üçün səfərbər olmuşdular.Ümumiyyətlə, Bakı möhtəşəm futbol yarışına yüksək səviyyədə ev sahibliyi etdi”.

A.Mirzəzadə əlavə edib ki, Bakı Olimpiya Stadionunda dünən baş tutan "Arsenal” – "Çelsi” qarşılaşması təkcə Azərbaycan futbol tarixində deyil, UEFA tarixində də yaddaqalan yer tutacaq.

Bununla belə deputat qeyd edib ki, futbol oyunu ərəfəsində xaricdən bəzi anti-Azərbaycan qüvvələr bu qarşılaşmanı gözdən salmağa çalışdılar, alınacağı təqdirdə oyunun başqa şəhərə keçirilməsinə dair maksimum güc ortaya qoydular:

“Lakin onların bütün bu cəhdləri uğursuz oldu. Azərbaycanın paytaxtı Bakı şəhərindəki 68 min tamaşaçı tutumlu Olimpiya Stadionunda möhtəşəm futbol yarışı baş tutdu. Bununla da dünya bir daha Azərbaycanın artan gücünü, müasir dövlət olduğunu gördü”.