MARKSİZM - LENİNİZM UNİVERSİTETİ FƏALİYYƏT GÖSTƏRƏCƏKDİR

Azərbaycan Kommunist Partiyası Mərkəzi Komitəsininin nəzdində Marksizm - Leninizm Universiteti fəaliyyət göstərəcəkdir. Bununla əlaqədar partiyanın mərkəzi komitəsi müvafiq qərar qəbul etmişdir. Partiya təhsili sisteminin bu mühüm bölməsinə Azərbaycan KP MK-nın ideoloji məsələlər üzrə katibi Ədalət Abdinov rəhbərlik edəcəkdir.
Ədalət Abdinov mətbuata açıqlamasında bildirmişdir ki, Marksizm - leninizm Universiteti sovet Rusiyasında 1938-ci ildə, Azərbaycan SSR-də isə 1943-cü ildə yaradılmışdır. Bizim yaratdığımız universitet də həmin təhsil sisteminin varisidir. Burada ilk partiya təşkilatların zəmanəti ilə, əsasən, ali təhsilli partiya üzvləri, komsomolçular, bitərəflər qəbul olunacaqdır.
Ədalət Abdinovun sözlərinə görə dinləyicilər Sov.İKP tarixini, siyasi iqtisadı, dialektik və tarixi materializmi, elmi kommunizmi, müasir mərhələdə Kommunist Partiyasının iqtisadi siyasəti məsələlərini, partiya və sovet quruculuğu, keçmiş sovet qanunçuluğunun əsaslarını, keçmiş SSRİ-nin xarici siyasətini, müasir beynəlxalq münasibətləri və s. öyrənəcəklər. Tədris planında Sovet İttifaqı Kommunist Partiyası Mərkəzi Komitəsi Siyasi Bürosunun üzvü, uzun illər Azərbaycan Kommunist Partiyası Mərkəzi Komitəsinin birinci katibi olmuş Heydər Əliyevin ictimai-siyasi fəaliyyətinin öyrənilməsinə geniş yer veriləcəkdir.
Marksizm - leninizm Universiteti Azərbaycan Kommunist Partiyası Mərkəzi Komitəsinin təsdiq etdiyi plan əsasında işləyəcəkdir.
- Təhsil prosesi mühazirə və seminarlardan ibarət olacaq və burada dinləyicilərin müstəqil işi geniş yer tutacaqdır. Universiteti bitirənlərə diplom veriləcəkdir - Ədalət Abdinov dedi.

Azərbaycan KP MK-nın mətbuat xidməti