"Ermənistan xarici işlər naziri Zöhrab Mnatsakanyan İsrailin KAN NEWS dövlət televiziya kanalına verdiyi müsahibə ilə İsrail ictimaiyyətinin fikrini aldatmağa cəhd göstərib. Hesab edirəm ki, bu cəhdlərin heç bir nəticəsi olmayacaq. Çünki İsrail dövləti və onun rəhbərliyi, eyni zamanda dünya icitmaiyyəti çox gözəl bilir ki, Azərbaycanın silah-sursat almasını bu ölkəyə onun üzləşdiyi şərait diqtə edir”.
Bunu açıqlamasında deputat Elman Nəsirov Ermənistan xarici işlər naziri Zöhrab Mnatsakanyanın İsrailin telekanalına müsahibəsində İsrailin silah ticarətinin erməni xalqının məhvinə gətirdiyini, habelə bölgədə silah yarışının sülh və təhlükəsizliyin qurulmasına xidmət etmədiyini ilə bağlı səsləndirdiyi fikirləri şərh edərkən deyib.

Onun sözlərinə görə, bu gün Ermənistan Azərbaycan torpaqlarının 20 faizini işğal edib və bu ölkə 30 ilə yaxındır ki, işğalçılıq siyasətinə son vermir.

“Əgər Ermənistan bu işğalçılıq siyasətinə son verərsə, Azərbaycanın heç bu qədər silah-sursat, hərbi texnika almasına da ehtiyac qalmaz. Torpaqlarımız işğal altında olduğundan Azərbaycan təkcə İsraildən deyil, o cümlədən Rusiya, Türkiyə, Belarus və digər ölkələrdən də silah-sursat alır.
Burada Ermənistanı narahat edən digər bir amil də var. Bu da ondan ibarətdir ki, Ermənistan istəsə belə İsraildən belə müasir silahlar ala bilməz. Çünki onun belə bir vəsaiti yoxdur. Ermənistan ancaq Rusiyadan 100-200 milyon dollar civarında kredit vasitəsi ilə güclə silahlar alır. Azərbaycan isə İsraildən silah almaq üçün 1,6 milyard dollarlıq müqavilə imzalayıb və onu həyata keçirir. Bu da onları ciddi narahat edir və bunun təsiri altında da Ermənistan XİN başçısı sayıqlayır. O baxımdan da Mnatsakyanın bu açıqlaması blefdir. O bu yolla nə İsrail, nə də dünya ictimaiyyətini aldada bilməyəcək”, - deyə deputat qeyd edib.
E.Nəsirov əlavə edib ki, bu gün bütün dünya kimin işğalçı, kiminsə işğala məruz qaldığını yaxşı bilir.

“Bu gün Azərbaycan işğal faktı ilə üz-üzə qalmasaydı, həmin pullar silaha deyil, regionun inkişafına, əhalimizin sosial rifah halının daha da yaxşılaşmasına yönəldirilərdi. İşğal faktı ilə üzləşdiyimizdən bizim müxtəlif ölkələrdən silah-sursat, hərbi texnika almağımız məntiqə uyğundur və bunun da səbəbi Ermənistanın Azərbaycana qarşı olan işğalçılıq siyasətidir. O baxımdan da bölgədəki gərginliyin yaranmasında məsuliyyət Ermənistanın üzərində düşür”, - deyə deputat qeyd edib.

Deputat onu da bildirib ki, Azərbaycan bu silahları vitrinə qoyub nümayiş etydirmək üçün almır: “Həmin silahlar bir gün tətbiq olunacaq. Ona görə də işğalçı Ermənistan rəhbərliyi papağını qarşısına qoyub yaxşıca fikirləşməlidir. Nə qədər gec deyil, bu işğlaçılıq siyasətindən geri dursun. Ermənistan bunu nə qədər tez anlayıb, konkret addım atsa, ilk növbədə onun özünə xeyirdir. Yəni Ermənistanın işğala son qoymasından ilk faydalalan ölkə elə özü olacaq. Bu səfalətdən qurtulub inkişaf etməyə başlayacaq. Bölgədə də sabitlik və təhlükəsizlik bərqərar olacaq. İndiki qloballlaşan dövrdə bir bölgənin sabitliyi, təhlükəsizliyi, inkişafı digər bölgələrin də sabitliyinə, inkişafına müsbət təsir göstərir”.