Azərbaycan Kommunist partiyasının Mərkəzi komitəsinin sədri Gülnisə Məhsimova aşağıdakı bəyanatla çıxış edib:

Son vaxtlar Azərbaycanda onsuz da pərakəndə fəaliyyət göstərən və əyalət dərnəkləri xarakteri daşıyan kommunist qurumlarında qəribə bir hal özünü büruzə verməyə başlayır. Belə ki, bəzi kommunistlər özlərinin bu pərakandəliyinin günahını nədənsə Rusiya Federasiyası Kommunist partiyasında (RFKP) və şəxsən onun rəhbəri G.A. Züqanovda görməyə çalışırlar. Burada xüsusilə Telman Nurullayevin rəhbərlik etdiyi Kommunist partiyasının Mərkəzi komitəsinin katibi Ədalət Abdinovun çıxışları diqqəti cəlb edir. Belə ki, Ə. Abdinov Rusiya və post-Sovet məkanı kommunistlərinin şəksiz lideri olan G.A. Züqanovu opportunizmdə və pozuculuq fəaliyyətində ittiham edir.
Ə. Abdinovun fikrincə, Kommunist partiyasında opportunistlər, təfriqəçilər və pozucu ünsürlər bu gün də mövcuddur. Amma soruşulmalıdır ki, bunun RFKP-yə və onun lideri G.A. Züqanova nə aidiyyatı var? Əgər Azərbaycanda Kommunist partiyası bu gün qruplar və dərnəklər formasında mövcuddursa və dar məhəlli xarakter daşıyırsa, G.A. Zuqanovu bunda günahlandırmaq absurddur. Səbəbini özündə axtarmaq əvəzinə günahkarı kənarda axtarmaq gerçəkdən gülməlidir.
Yəqin Ə. Abdinov yoldaş bilməmiş deyil ki, Rusiyanın ən nüfuzlu siyasətçilərindən olan G.A. Zuqanovun partiyası Rusiya Dövlət Dumasında 92 deputatla təmsil olunur. Keçən il mən RFKP-nin 1 May tədbirinə qatılmışdım. Həmin tədbirdə 100 min nəfər iştirak edirdi. Bunun nə demək olduğunu başa düşmək çətin deyil.
G.A. Zuqanov əsil kommunist və yüksək beynəlxalq səviyyədə tanınmış liderdir. Onun haqqında bu cür mənfi fikirlər söyləmək üçün ən azı onun etdiklərinin cüzi bir hissəsini etmək lazım gəlir. Amma təəssüf ki, bu belə deyil. Hər halda, pərakəndəlik və məhəlli dərnəkçilikdən yaxa qurtara bilməyən Azərbaycan kommunistləri özlərinin bu mərəzlərini G.A. Züqanov və RFKP-də axtarmamalıdır. Unutmaq lazım deyil ki, bu gün məhz G.A. Züqanovun rəhbərlik etdiyi RFKP bütün post-Sovet məkanında olan kommunist hərəkatının lideri və ümid yeridir.
Odur ki, bu gün G.A. Züqanovun əleyhinə kampaniya Azərbaycandakı kommunist hərəkatına ancaq zərər vura bilər.

Gülnisə Məhsimova
Azərbaycan Kommunist partiyasının Mərkəzi komitəsinin sədri