Prezident İlham Əliyev Ulu öndərin güclü, nüfuzlu Azərbaycan quruculuğu siyasətini uğurla davam etdirir

Siyasətdə, dövlət idarəçiliyində varisliyin təmin olunması inkişafa təkan verən fundamental amil rolunda çıxış edir.

O ölkələrdə ki, varislik təmin olunur, siyasi miraslar və ənənələr qorunub saxlanılır, orada geri dönmələr də baş vermir, milli güc və enerji çəkişmələrə deyil, ardıcıl olaraq strateji məqsədlərə nail olunmasına yönəldilir.

Bu haqda Ulus.Az-ın Analitik Mərkəzi məlumat yayıb. Bir neçə nəslin davamlı səylərinin nəticəsində isə ölkə güclənir, insanlarda perspektivlə bağlı böyük inam yaranır. Bu baxımdan Azərbaycanın nümunəsi ibrətamizdir.

2003-cü ildə ölkəmizdə növbəti prezident seçkiləri keçirildi və xalq Ulu öndərin siyasi məktəbinin ən layiqli yetirməsi İlham Əliyevi müstəqil Azərbaycanın dövlət başçısı seçdi.

Heydər Əliyev ideyalarına sadiqlik Azərbaycanı regional və qlobal güc amilinə çevirib. Ölkəmizin fəal təşəbbüsləri sayəsində Ermənistan istisna olmaqla, digər qonşuların - Rusiyanın, Türkiyənin, İranın iştirakı ilə yeni əməkdaşlıq platformaları yaradılıb.

Azərbaycanın davamlı olaraq həyata keçirdiyi müstəqil xarici siyasət, ölkələrin, xalqların yaxınlaşması naminə göstərdiyi səylər bütün dünyada respublikamıza böyük hörmət qazandırıb.

Azərbaycanın qısa müstəqillik tarixində əldə etdiyi ən böyük uğurlarından biri ölkəmizin beynəlxalq imicinin əhəmiyyətli dərəcədə artması ilə bağlıdır. Hazırda gənc Azərbaycan dövləti dünyanın əksər ölkələri ilə sıx əlaqələr qurmağa müvəffəq olub.

Ölkəmiz beynəlxalq təşkilatlarda, o cümlədən də BMT-də, Qoşulmama Hərəkatında, İƏT-də və digər nüfuzlu qurumlarda uğurla təmsil olunur.

Prezident İlham Əliyevin davam etdirdiyi islahatlar kursu ölkəmizdə güclü iqtisadiyyat quruculuğu üçün etibarlı zəmin yaradıb.

2004-cü ildən start verilən regionların sosial-iqtisadi inkişafına dair müvafiq Dövlət proqramlarının uğurla reallaşdırılması sayəsində bölgələrin də tarazlı şəkildə inkişaf etməsi və iqtisadi güc amilinə çevrilməsi ölkənin potensialının artmasına güclü impuls verib.

Əlamətdar haldır ki, Azərbaycanın əldə etdiyi uğurlu iqtisadi inkişaf göstəriciləri nüfuzlu beynəlxalq reytinq agentlikləri tərəfindən də yüksək qiymətləndirilir.

Yeni şəraitdə başlanan islahatların əhatə dairəsi isə daha genişdir. Prezident İlham Əliyev meydana çıxan çağırışlara uyğun olaraq ölkədə biznes mühitinin optimallaşdırılması, bank-maliyyə sektorunda inklüzivliyin daha da artırılması stiqamətində böyük işlər görüb.

Daxili istehsalın qorunması, sahibkarların vergi yükünün azaldılması yolu ilə vergi bazasının genişləndirilməsi, gömrük nəzarətinin sadələşdirilməsi və şəffaflığın təmin olunması, istehsal imkanlarının genişləndirilməsi, investisiya qoyuluşunun, ixracın təşviq edilməsi üçün fərman və sərəncamlar imzalayıb.