Hökumət islahatları: İlk hədəf Nazirlər Kabinetidir

Prezidentin sosial şəbəkə hesablarında Dövlət Suverenliyi Günü ilə bağlı videoçarx paylaşılıb - Video

Azərbaycanda Dövlət Suverenliyi Günüdür

Azərbaycan lideri xanımı ilə ziyarətgahda - Fotolar

İlham Əliyev TDT TŞ rəhbərlərini qəbul etdi

İlham Əliyev açılışda iştirak edib - FOTOLAR

Süni intellektin tətbiqi genişləndirilməlidir - İlham Əliyev

Prezident icra başçısını vəzifədən AZAD ETDİ

Prezident Hakan Fidanı qəbul etdi - Foto

Hökumət islahatları: İlk hədəf Nazirlər Kabinetidir

Siyaset

Oxunub: 2 248

3 okt 2016 | 21:25

Referendumdan sonra hökumətin ciddi islahatlara gedəcəyi söylənilirdi. İslahatların Nazirlər Kabinetindən başlayacağı isə gözlənilir. Çünki bu günə qədər islahatlara əngəl olan qurum məhz Nazirlər Kabineti oldu. Sirr deyil ki, Nazirlər Kabineti islahatların lokomotivinə çevrilə bilmədi. Hesab olunur ki, hökumətin “iki daşın arasında” referendum keçirib Konstitusiyanı dəyişməsi və vitse-prezidentlik postunu yaratması da buna hesablanıb. Prezidentin köməkçisi, Prezident Administrasiyasının İctimai-siyasi məsələlər şöbəsinin müdiri Əli Həsənov da jurnalistlərə açıqlamasında bu məqama toxunub və ölkənin post-neft dövrünə uyğunlaşması üçün islhatların vacibliyini vurğulayıb.

Növbəti dəfə isə bu məsələyə Prezident Administrasiyasının başqa bir şöbəsinin müdiri Şahin Əliyev də münasibət bildirdi. O, da bildirdi ki, Nazirlər Kabineti işini yarıtmaz şəkildə yerinə yetirir və bu da yeni idarəçilik sistemi tələb edir.

Əhali də Nazirlər Kabinetinin işindən narazıdır və bu, faktdır. Baş nazir Artur Rəsizadə hər zaman ironik formada əhali tərəfindən yada salınır. Bunu hökumətdə də hər kəs bilir. Təbii ki, bu da islahatları zəruri edir və hər kəs də islahat gözləyir. İslahatların aparılması üçün ilk növbədə idarəçilik sistemi dəyişdirilməlidir. Hər kəsə məlumdur ki, ölkə “kurator” sistemilə idarə olunur. Nazirlərin hər birinin öz “regionu” var. Bu cür idarəetmə islahatların aparılmasına mane olur. Bəzi oliqarx- nazirlər islahatların aparılmasına imkan vermir. Ancaq yeni yaradılan vitse-prezidentlik postu bu problemləri həll etməkdə mühüm roll oynayacaq.

Siyasi qərar verilib

Referendum qərarı verildiyi vaxtdan bu günə qədər hökumət nümayəndələri, deputatlar 26 sentyabr referendumunun məhz islahatarın aparılması üçün keçirildiyini bildirirdilər. PA rəsmisi Əli Həsənov da açıqlamasında hazırda həmin islahatlar paketinin qəbul olunduğunu, “islahat qatarının artıq relsə çıxdığını” deyib: “Bu iş üçün ölkənin bütün imkanları, həm inzibati, həm iqtisadi, həm də insan resursları səfərbər edilməkdədir.

Ona görə də referendum təşəbbüsünün əsas səbəblərindən biri də Azərbaycanda post-neft dövründə çevik iqtisadi islahatların keçirilməsi, effektli idarəçilik sisteminin yaradılması və mövcud bürokratik idarəçilikdəki bəzi mexanizmlərin aradan qaldırılmasıdır”.

Ölkədə aparılacaq islahatların Nazirlər Kabineti üzərində fikuslaşması heç də təsadüfi deyil. Nazirlər Kabineti islahatların açar nöqtəsi olacaq. Bu barədə artıq ciddi informasiyalar da yayılır. “Cümhuriyət”in ötən saylarında da bu haqda geniş yazılar dərc olunub.

İqtidar islahatlarda maraqlıdır

Görünən odur ki, islahatların aparılması hökumətin marağında olan məsələdir. Əks halda, hökumət rəsmiləri bu haqda belə inamla danışmazdılar. Uzun zamandır, xüsusilə də ölkədə baş verən ağır böhrandan sonra islahatların aparılması müzakirə olunur. Ancaq bu günə qədər heç bir islahat aparılmayıb. Sadəcə bəzi dövlət qurumları ləğv olunub, əvəzində isə iki qurum yaradılıb. Bunu ictimaiyyətə islahat adı altında təqdim etsələr də heç kimi bunu qəbul etmədi. Həmin dövrdə hökumət islahat aparmadı, sadəcə imitasiya ilə məşğul oldular. Bu dəfə isə mənzərə tamamilə fərqlidir. Hər kəsə məlumdur ki, ölkədə yüksək vəzifə sahibi olan insanlar böyük gücə çevriliblər. Onları birdən-birə istefaya göndərmək heç də hökumətin xeyrinə olmaz.

Çünki oliqarxlara toxunduqda onlar radikallaşır və hakimiyyət üçün böyük təhlükə mənbəyinə çevrilir. Ona görə də referendumun keçirilməsi vacib hesab olundu. Beləliklə də islahatların aparılmasında ilk addım atılmış oldu. Nəticəsini isə zaman göstərəcək. Aparılacaq islahatlara qarşı çıxan hökumət rəsmiləri də var. Yayılan məlumatlar da bunu bir növ təsdiq edir. Məlumatlarda bildirilir ki, bu günə qədər islahatlar aparılmasının qarşısını da məhz hökumətin daxilində olan bəzi qüvvələr kəsib. Həmçinin qeyd olunur ki, referendum bütün bu kimi problemlərin aradan qaldırılmasını təmin etdi. Artıq islahat proqramı tam hazırdır və yaxın zamanda islahatların aparılması reallaşacaq.