Rusiyanın xarici işlər naziri Sergey Lavrovun Azərbaycana səfəri başlayıb.
ANS PRESS-in məlumatına görə, hazırda Bakıda Sergey Lavrovla Azərbaycan prezidenti İlham Əliyev arasında görüş keçirilib. Sabah isə Lavrov Elmar Məmmədyarovla görüşəcək.
Aprelin 7-də Azərbaycan paytaxtında Rusiya, İran və Azərbaycan xarici işlər nazirlərinin görüşü keçiriləcək.
Rusiya XİN-dən verilən məlumata əsasən, cümə axşamı Sergey Lavrovla Azərbaycanın xarici işlər naziri Elmar Məmmədyarov arasında ikitərəfli görüş keçiriləcək.
Həmin görüşdə əsas müzakirə mövzusu Dağlıq Qarabağ münaqişəsində yaranmış son vəziyyət olacaq.
Lavrov sonuncu dəfə 2015-ci ilin sentyabr ayının 1-də Bakıda səfərdə olub. Həmin görüşdə də Dağlıq Qarabağ münaqişəsi müzakirə olunmuşdu.
Rusiya rəsmilərinin bu səfəri isə cəbhədə gərginliyin pik həddə çatdığı bir dövrə təsadüf edir. Dağlıq Qarabağda baş verən son gərginlikdən sonra ATƏT-in Minsk qrupunun həmsədrləri Ceyms Uorlik, İqor Popov, Pyer Andrü və ATƏT-in hazırkı sədrinin xüsusi nümayəndəsi Anji Kaspşik Azərbaycana səfərə gəlib. Onlar prezident İlham Əliyevlə görüş keçiriblər.
Həmsədrlər bildiriblər ki, Ermənistan-Azərbaycan, Dağlıq Qarabağ münaqişəsinin həlli ilə bağlı hazırda aparılan danışıqlar daha intensiv xarakter almalı və bu danışıqlar nəticəsində münaqişə tezliklə öz həllini tapmalıdır.