Belarus prezidenti Aleksandr Lukaşenko Azərbaycan prezidenti İlham Əliyevə zəng edib. ANS PRESS-in məlumatına görə, prezidentlər cəbhə xəttindəki son vəziyyəti müzakirə ediblər.

Belarus mətbuatı yazır ki, prezident Lukaşenko Qarabağda gedən ağır döyüşlərə görə İlham Əliyevə narahatlığını ifadə edib.
Müdafiə Nazirliyi cəbhədə baş verənlərlə bağlı məlumat yayıb
Azərbaycan Müdafiə Nazirliyi bildirir ki, aprelin 2-nə keçən gecə və gün ərzində bütün cəbhə boyu möqelərimiz və yaşayış məntəqələrimiz düşmən tərəfindən intensiv atəşə məruz qalıb. Bunun nəticəsində mülki əhali arasında ölən və yaralananlar var.
Bu təxribatın qarşısının alınması, mülki əhalinin təhlükəsizliyinin təmin olunması məqsədilə Silahlı Qüvvələrimizin komandanlığı tərəfindən Ağdərə-Tərtər-Ağdam və Xocavənd-Füzuli istiqamətində cavab tədbirlərinin keçirilməsi barədə qərar qəbul edilib.
Qısa müddətdə həyata keçirilən sürətli əks-həmlə zamanı erməni birləşmələrinin uzun illərdən bəri mühəndis-istehkam baxımından möhkəmləndirdiyi birinci müdafiə xətti cəbhənin bəzi istiqamətlərində yarılıb, strateji əhəmiyyətə malik bir neçə yüksəklik və yaşayış məntəqələri düşməndən tam azad olunub.
Goranboy rayonu və Naftalan şəhərinə təhlükə yarada biləcək Talış kəndi ətrafındakı yüksəkliklər, eləcə də Seysulan məntəqəsi düşmən qüvvələrindən tam təmizlənib.Horadiz şəhərinin düşmən təhlükəsindən qorunması məqsədilə Füzuli rayonu istiqamətində yerləşən, geniş ərazini nəzarətdə saxlamaq imkanı verən strateji əhəmiyyətli "Lələ təpə" adlandırılan yüksəklik də bölmələrimizin nəzarətinə keçib.

Qeyd edək ki, ABŞ-da rəsmi səfərdə olan Azərbaycan prezidenti, Azərbaycan Silahlı Qüvvələrinin Ali Baş komandanı İlham Əliyevə Azərbaycan və Ermənistan silahlı qüvvələrinin təmas xəttində gərginliyin artması ilə bağlı məruzə olunub.