Qubadlı rayonu şimaldan Laçın, cənubdan Zəngilan, şərqdən Xocavənd və Cəbrayıl rayonları, qərbdən Ermənistanla həmsərhəddir. Bazarçay (Bərgüşad), Həkəri, Kiçik Həkəri, Meydan dərəsi çayları və çoxlu bulaqlar rayonun əsas su mənbəyidir.
Qubadlı rayonu, əsasən, dağlıq relyefə malikdir. Ərazisi Qarabağ silsiləsinin cənub-qərb (Topağac dağı – 2010 m, Pirdağ–1316 m, Amuduq), Bərgüşad silsiləsinin şərq (Hərtis dağı – 1279 m, Qartiz – 1277 m, Qurbantəpə – 1075 m), və Qarabağ yaylasının cənub-şərq (Qurbantəpə dağı – 1075 m) hissəsini əhatə edir. Qarabağ yaylasının cənub-şərq qurtaracağı olan Yazı düzü (Bazarçay və Həkəri çayı arasında) ərazidə 450 m-dək alçalır. Ərazidə Qarabağ silsiləsi, Uyuqlu, Bezmindağ, Günbəzdağ maili və dalğalı İncə düzünə keçir. Yura–Antropogen çöküntüləri bu ərazidə yayılmışdır. Əqiq yatağı da mövcuddur. Çayları Bazarçay, Həkəri və onların qollarıdır (Kiçik Həkəri, Meydandərəsi və s) bunlardan suvarmada istifadə edilir.
Rayonun ərazisində əsasən, qəhvəyi dağ-meşə torpaqları üstünlük təşkil edir. Əsas bitki örtüyü kollu və seyrək meşəli çəmənlərdir. Dağ meşələri (fıstıq, palıd, vələs və s.) var. Meşələrin ümumi sahəsi 13,2 min hektardır. Ayı, canavar, vaşaq, tülkü, boz dovşan, süleysin, oxlu kirpi və s. kimi heyvan növləri ilə də bu ərazilər zəngindir. Quşlardan boz kəklik, turac, qırqovul, göyərçin və s. var. Rayonda Qubadlı yasaqlığı təşkil edilib.
İqlimi əsasən mülayim isti və quru subtropikdir. Orta temperatur yanvarda düzən yerlərdə 1 dərəcədən dağlıq yerlərdə – 4 dərəcəyə qədər, iyulda müvafiq olaraq 26 və 14 dərəcə olmaqla dəyişir. İllik yağıntı 400–600 mm. təşkil edir.
Qubadlı rayonu 14 mart 1933-cü ildə yaradılmışdır. Ərazisi 802 km2-dir və 1 şəhər, 30 qəsəbə, 93 kənddən ibarətdir.