Gənclər ilk beynəlxalq lisenziyalı yarışmada səslərini sınayacaq.

"Səs Azərbaycan" (The Voice of Azerbaijan) yarışmasının münsiflər heyəti məlum olub.

ANS PRESS-in məlumatına görə, münsiflər heyətinin sırasına Faiq Ağayev, xalq artisti Mübariz Tağıyev, Manana Caparidze və Tünzalə Ağayeva daxildir.

Bütün dünyada yayımlanan və məşhurlaşan "Səs" (The Voice) yarışması noyabrın 1-dən etibarən AZ TV-də yayımlanacağı gözlənilir. Yarışmada iştirak etmək istəyənlər www.thevoice.az saytı vasitəsi ilə qeydiyyatdan keçiblər. Səs Azərbaycan yarışmasının bir qrup üzvü avqustun 23-dən sentyabrın 1-ə qədər 10 şəhərdə olub və xüsusi səsə, istedada malik olan gəncləri seçiblər.

Bu zaman ərzində 300 potensial konkursantın qeydiyyatdan keçdiyi göstərilir. Ümumilikdə isə yarışmada iştrak etmək üçün ərizə göndərənlərin sayı 1500-ü keçib.

"Səs Azərbaycan" yarışmasının münsiflər heyətinin üzvlərindən biri Tünzalə Ağayeva bu layihənin Azərbaycanda keçirilməsinin çox qürurverici hadisə olduğunu qeyd etdi.

"Mən çox şadam ki, bütün dünyada tanınan layihədə münsiflər heyəti kimi çıxış edirəm. İstedadlı gəncləri seçmək, onların üzə çıxarılmasında, tanınmasında həm həmkarlarımın, həm də mənim rolum olacağına görə çox şadam. İnanıram ki, doğurdan da səsi olan insanlar bu layihəyə qatılacaq, ümid edirəm ki, kim layiqdirsə o da qazanacaq" - deyə müğənni bildirb.

Bu beynəlxalq müsabiqənin ölkəmizdə keçirilməsinin bir çox müsbət tərəflərinin olduğunu qeyd edən əməkdar artist yarışmanın ilk növbədə istedadlı gənclərin ölkəmizdən kənarda tanınması üçün geniş imkanlar atacağını dedi.

"Layihənin adına uyğun olaraq güclü səsi olan, maraqlı, qeyri adi, istedadlı, yadda qalan olacaq insanları axtarıb onlar arasında seçim edəcəyik. Mənim seçəcəyim gənclər bu istedada malik olmalıdır. Səs texnikası, səs tonu, rəngləri maraqlı olmalıdır. Digər müsabiqələrdə olduğu kim hər cür səsə malik olan insan gələ bilər yeni başlayan təcrübəsi olmayan və eyni zamanda da təcrübəli insanlar müsabiqədə iştrak edə bilər. Səsin potensialına baxacam. Əgər bu səsdən güclü bir səs etmək olarsa bunu edəcəm. Mənim üçün səs zəngin texnika çox önəmlidir."

Amma müğənni hazırda ölkəmizdə keçirilən bir çox müsabiqələrin həm keyfiyyət, həm də kəmiyyət baxımından aşağı səviyyədə olduğunu qeyd etdi. O,özünün də iştrak etdiyi və qalib olduğu Bakı Payızı müsabiqəsini nümunə gətirən əməkdar artist indi belə müsabiqələrin olmadığını vurğulayıb.

Digər münsif əməkdar artist Manana Caparidze yarışmanın böyük uğur qazanacağına inandığını deyib:

"Mənə bu layihədə münsif kimi çıxış etməyi təklif edəndə böyük məmnuniyyətlə qəbul etdim. Bu layihədə istedadlı gənclər iştirak edəcək. Mən və mənim həmkarlarım gəncləri dəstəkləyəcəyik. Azərbaycanda heç kimə tanış olmayan gözəl ifaçılar tapsaq, bu, böyük qələbə olacaq. Mən vokalçı pedaqoq kimi öz bildiklərimi gənclərə öyrədəcəm. Birinci növbədə səsdir. Səsdən başqa iştrakçılarda xarizma olmalıdır. Səhnə mədəniyyəti də çox vacibdir."

Manana Caparidze bildirib ki, "Səs Azərbaycan" yarışması Azərbaycanda ilk beynəlxalq lisenziyalı yarışmadır: "Çox güclü komanda heyəti var. İstər Azərbaycandan, istər Ukraynadan, istər də Gürcüstandan peşəkarlar cəlb olunub".

Onun sözlərinə görə, hazırda seçimlər davam edir. Oktyabrın ortalarında və ya sonunda efirə getməsi gözlənilir.

Bu müsabiqə dünyanın 50-dən çox ölkəsində, o cümlədən Azərbaycanın qonşuları olan Türkiyə və Rusiyada da yayımlanır.

Azərbaycanı bu il "Eurovison" yarışmasında təmsil edən Elnur Hüseynov Türkiyədə sözügedən müsabiqənin – "O ses Türkiye"nin qalibi olmuşdu. Azərbaycandan bir çox musiqiçi qonşu ölkələrdə keçirilən həmin müsabiqədə özünü sınayıb.

"The Voice" yarışması ilk dəfə Niderlandda yaranıb və 2010-cu ildə isə "The Voice" yarışması sonra bütün dünyaya yayılaraq məşhurlaşıb. Dünyanın 50 ölkəsindən çoxunda reytinqlərdə birinci yerdə qərarlaşaraq özünə əməll-başlı pərəstişkar ordusu yığıb. Bu yarışmanın Azərbaycan tamaşaçısı tərəfindən geniş kütlə ilə yayılan Türkiyədə (O ses Turkiye) və Rusiyada ("Голос") yarışması özünə geniş kütlədə tamaşaçı yığıb.