Müğənni Xuraman Şuşalı Şuşa ilə bağlı xatirələrindən danışıb.
İfaçı ''Ölkə.Az''-ın əməkdaşı ilə söhbətində öz kədərli xatirələrini yada salıb.
''Şuşa mənim atalı-analı illərimdir. Şuşadan çıxanda atam yaralandı və üç il yataq xəstəsi oldu. Anam da Qarabağ əlili idi. Çünki o da Qarabağda yaralanmışdı. Mənim Şuşa ilə bağlı xatirələrim nisgilli, çox kədərlidir. Ancaq uşaqlıq illərim yaddaşımda xoş xatirələr kimi həkk olunub. Şuşadan yaddaşımda İsa bulağı, Cıdır düzü, füsünkar təbiəti qalıb. Çünki, mən hər zaman təbiət aşiqi olmuşam. Məhz ona görə də gəzdiyim yerləri çox yaxşı xatırlayıram. Məni Turşsuya, təbiət qoynuna tez-tez gəzməyə aparardılar. İndi isə illər ötür, yaşlı nəsil dünyasını dəyişir” - deyə, o, fikrini tamamlayıb.

Qeyd edək ki, Şuşa şəhəri 1992-ci il 8 may tarixində Ermənistan tərəfindən işğal olunub.