Bu gün Qarabağ müharibəsinin qəhrəman səhra komandirlərindən biri Allahverdi Bağırovun doğum günüdür.

Bu gün təkcə ailə üzvləri deyil, keçmiş əsgərləri, silahdaşları mərhum milli qəhrəmanın anım günün qeyd edəcək, cəsur döyüşçünün xatirəsini yad edəcəklər.

Milli Qəhrəmanın qızı Aynur Bağırova Cebhe.info-ya açıqlamasında Allahverdi Bağırovun Ağdamda bütün xüsusiyyətləri ilə sevilən bir qəhrəman olduğunu qeyd etdi:

“Ağdamlıların nəyə ehtiyacı var idisə, ödəyər, toyu var idisə, toyunu, yası var idisə, yasını edərdi. Müharibə dövründə özünün qohumlarını, Ağdamın igid oğullarını toplayıb bir batalyon yaratdı və torpağımızın müdafiəsinə qalxdı. Bu gün böyükdən kiçiyə hər kəs Allahverdi Bağırovu sayğı ilə anır. Biz də fəxr edirik ki, atamın belə qədrini bilirlər, ona layiqincə qiymət verirlər”.

Aynur xanım bildirib ki, bütün Azərbaycan Allahverdi Bağırovu unutmur:

“Hər il doğum günündə, şəhid olduğu gün, Xocalının, Ağdamın işğal günlərində jurnalistlər zəng edir, atamla bağlı açıqlama alırlar. Sağ olsunlar ki, həyatını vətən torpaqları uğrunda fəda etmiş insanı unutmurlar. Allahverdi Bağırov şəhid olsa da, onun yolunu davam etdirən hərbçilərimiz var. Tanrı onları qorusun. Nə qədər ki Azərbaycan var, Allahverdi Bağırov kimi oğullar da yetişəcək”.