İfaçı Afət Fərmanqızı “Xəzər” televiziyasının efirinə çıxan müğənnilərdən ödəniş tələb olunduğunu iddia edib.
O, bu barədə “İnstagram” səhifəsində açıqlama yayıb. Məsələ ilə bağlı “Xəzər” televiziyasında “5-də 5” verilişinin layihə rəhbəri Rauf Sübhinin mövqeyini öyrənməyə çalışdıq. O, Fərmanqızının irəli sürdüyü ittihamın təmamilə uydurma olduğunu bildirib.

“Mən layihə rəhbəri olaraq, buradan bəyan edirəm ki, “5-də 5” verilişi olaraq, Afət Fərmanqızından heç vaxt ödəniş tələb etməmişik. Bu tamamilə onun uydurma bir iddiasıdır. Əgər belə bir məsələ varsa, ad çəksin. Kim, nə zaman ondan ödəniş tələb edib. Sübut, dəlil gətirsin. Belə tapmaca kimi danışmağa, “Xəzər”in adından istifadə edib, gündəmə gəlməyə lüzum yoxdur”,- deyə Rauf Sübhi billdirib.

Əməkdaşımızın “qara siyahı”ya düşən müğənnilər haqda sualına cavab olaraq o “Bu barədə heç bir məlumatım yoxdur. Ona görə heç nə deyə bilməyəcəyəm”,- deyə bildirib.
Qeyd edək ki, Fərmanqızı “İnstagram” səhifəsində “Xəzər” televiziyasına sərt ittihamlar ünvanlayaraq, “Pul istəyirdilər deyə, heç o efirə çıxmırdım. Mənim ondan başqa üstün efirlərim var” sözlərini yazıb.