Əməkdar artist Aybəniz Haşımova BNA haqqında yazdığı tənqidi statusun silinməsinə aydınlıq gətirib.
“Ölkə.Az” xəbər verir ki, o bu barədə “İnstagram” hesabından paylaşım edib.

“O gün BNA haqqında yazdığım statusun paylaşımından dərhal sonra, hörmətli Mayis bəy mənə telefon edərək şikayətimlə maraqlandı. Mayis bəyin məsələylə bağlı maraqlanacağına güvənərək, statusun altında yazılan rəylər Mayis bəyi narahat etdiyinə görə, yazmış olduğum statusu sildim. Sizi öncədən tanıdığıma və sevimli İTV-nin keçmiş əməkdaşı olduğunuz üçün statusumu pozdum. İndi mənə videonu göndərirlər, baxıb görürəm ki, İctimai-də deyirsiniz ki, Aybəniz xanım yazmış olduğu statusunu yanıldığından sonra pozub. Super marketin qarşısında yazılan qeyri-qanuni cərimədən söhbət gedirdi və siz də dediniz ki, araşdırıb məsələyə aydınlıq gətirəcəksiniz. Məsələ 20 manat edilən cərimə dərdi deyil. Əgər super marketin və yaxud digər mağazaların qarşısında maşın saxlamağa qadağanız varsa, onda bunu insanlara bildirmək lazımdır və insanlar da bilsin ki, marketdən alış-veriş etmək üçün yalnız taksi xidmətindən istifadə etməlidirlər”, - deyə xanım sənətçi qeyd edib.

Daha sonra əməkdar artist Mayis Ağayevin “Sənətçi gərək adi insanlara nümunə olsun” fikrinə də münasibət bildirib.

“O ki qaldı nümunə olmağa, siz deyəsən məni indiyədək heç tanımamısınız?!
O zaman, əgər o yerlərdə maşın saxlamaq qadağandırsa, onda zəhmət olmasa bununla bağlı bir işarə qoyulsun! İnsanlar da işini bilsin”.

Xatırladaq ki, Haşımova sosial şəbəkədə BNA-nın işçilərinin yazdığı yersiz cərimələrdən şikayət edib.

BNA-nın mətbuat katibi Mais Ağayev isə İTV-də yayımlanan "3D" verilişində qonaq olarkən A.Haşımovanı tənqid etmişdi.