Müğənni Mənzurə Musayeva ATV-də Günay Firudinqızının aparıcılığı ilə yayımlanan "Ulduzlu yayım" verilişinin qonağı olub.
Sənətçi sənəti və şəxsi həyatı barədə bir sıra sualları cavablandırıb. "Ölkə.Az" həmin müsahibəni təqdim edir.

- Hələ bu yaşa qədər heç nə etdirməmişəm. Kosmoteloq dostlarımız var. Hərdən deyirlər ki, gəl, botoks edək. Bu yaxınlarda ilk dəfə alnıma botoks etdirmişəm. Deyirlər ki, alnında qırışlar var. Adamın üzündə qırış olar da. Gərək elə botoks olsun? Qorxuram ki, əməliyyat etdirərəm, sonra üzüm əyilər. Nəsə xoşuna gəlmirsə, kəs, getsin. Üzünü doldurmaqdansa kəsməyin tərəfdarıyam (gülür). Məsələn, burnum üç dəfə əməliyyat olunub. "Youtube"da cavanlıq şəkillərim var, baxa bilərsiniz ki, burnum heç vaxt yekə olmayıb. Sadəcə, nəfəsimdə problem var idi. Birinci əməliyyatdan sonra da problem aradan qalxmadığına görə növbəti əməliyyatları etdirdim. Çünki mən oxuyuram, düzgün nəfəs almalıyam. Üçüncü əməliyyatdan sonra daha yaxşı nəfəs alıram.

- Atalar üçdən deyib.

- Hə (gülür). Allah etsin yaxşı olsun. Yenə nəfəs ala bilməsəm, dördüncü dəfə də əməliyyata girəcəyəm.

- Bodrumda ərə getdiz?

- (gülür) Yenə alınmadı. Alınmır məndə, neyniyim?

- Ümumiyyətlə, xarici vətəndaşla ailə qurarsız?
- İnanmıram.

- Əgər çox pulu olsa?

- Pul mənimçün önəmli deyil. İnsanın insanlığı olmalıdır. Elə pullu insanlar var ki...

- Amma elə müğənnilər var deyirlər ki, kasıb adamla necə ailə qura bilərəm, mənim paltarımı kasıb necə ala bilər?

- Vallah, mən heç vaxt o barədə düşünməmişəm. Paltarlarımı özüm almışam. Düzdür, müğənnilik başlanğıcda xərcləri çox olan sənətdir. Amma onların da öhdəsindən Allahın köməyi və xalqın sevgisi ilə gəlmişəm. Heç kimə ehtiyacım olmayıb. Durum yalandan nəsə deyim? Nəyim varsa min şükür. On beş yaşımdan toya gedirəm. Bilməmişəm ki, illərim necə gəldi, keçdi. Axşam bu rayondan gəlmişəm, sabah durub başqa rayona toya getmişəm. Çox vaxt mənə sual verirlər ki, niyə ailə qurmursan? Ailəni bir dəfə qurarlar. Gətirməyəndə gətirmir də. Allah sənə bir tərəfdən verirsə, başqa tərəfdən alır.

- Duet ortağınız Üzeyirlə necə tanış oldunuz?

- Bakıda bir məclisdə sintezator ifa edirdi. O vaxta qədər Üzeyirin oxumağını görməmişdim. Təklif etdim ki, belə aranjiman edə bilirsən? Nömrələrimizi bir-birimizə verdik. Bir müddət sonra zəng vurdu ki, biz duet oxuya bilərik? Dedim ki, yaxşı mahnı olsa, oxuyarıq. Mahnını görməliyəm, elə-belə mahnı oxumuram. Mənə gündə əlli mahnı göndərirlər ki, aranjiman da edirik, oxu. Deyirəm ki, bu mahnıda özümü görmürəm. Üzeyirə dedim ki, mahnı hit olmayacaqsa, onu oxumaram.