“Ərə getməkdən xoşum gəlir”.

Bu sözləri müğənni Nura Suri “Sevgi romanı” adlı mahnıya çəkilən klipinin təqdimat mərasimdə deyib. Sözləri Zülfi Bədəlova, aranjimanı Fərid Ağaya aid olan mahnıya klip çəkdirən müğənni mətbuat konfransı keçirib. Nura Suri mətbuat konfransında jurnalistlərin suallarına cavab verib. İfaçı bildirib ki, klipin rejissoru Natiq Muxtarovdur. Geyimləri üzərində isə tanınmış stilist Elnur Həsənov çalışıb. Nura Suri onu da əlavə edib ki, yumoristik janrda çəkilən ekran işində tərəf müqabili rejissor Natiq Muxtarov özü olub:

“Klipdə gördüyünüz əllər, üzü görünməyən tərəf müqabilim və məni balışla döyən şəxs məhz rejissor Natiq Muxtarov idi".

Daha sonra müğənni əlavə edib ki, Z.Bədəlovla qarşıda bir neçə layihəsi var:

“Zülfi ilə işbirliyimiz uğurlu alındı, ondan istədiyimi ala bildim. İkinci və üçüncü mahnımın sözlərini də o, yazıb. İkinci mahnını yeni kliplə birlikdə dekabr ayında təqdim edəcəyik”.

Tədbirin səbəbkarı etiraf edib ki, məhərrəmlik ayında başqa işlər olmadığndan yaradıcı işlərə daha çox vaxt ayıra bilib. O, hazırda klip bazarında olan durğunluqdan və efirlərdəki bayağılıqdan da söz açıb:

“Dayanmadan iş görürük, qarşıda daha bir neçə layihəmiz var. Bir müddət ad almış, hörmətli və sevilən bir çox müğənnilər efirə çıxmadı. Bu səbəbdən də səhnə boş qaldı və nəticədə bayağı musiqi dəbə düşdü. İkinci məsələ bizdə klip kanallarının olmamasıdır. Hər dəfə demişəm ki, klip olmadığından pul xərcləyib klip çəkdirmək müğənnilərə sərf etmir. Çünki telekanallarda kliplərə sadəcə 1 saat vaxt ayrılır. Ekran işi gün ərzində ən azı 5-10 dəfə yayımlanmalıdır ki, mahnı tanınsın və sevilsin".

Nura Surinin sözlərinə görə, son illərdə Azərbaycan şou-biznesində olan durğunluğu Xalq artisti Aygün Kazımova və əməkdar artist Röya Ayxan pozub:

“Bunu dana bilmərəm. Onlar hər ikisi bir-birinin ardınca yeni layihələr təqdim etdilər. Bundan sonra xanım müğənnilər çox aktivləşdi. Mən bunu bəyənirəm və bu mənə stimul verir. Əslində bu, sağlam rəqabətdir. Söhbət xanım ifaçılardan gedir. Faiq Ağayev və digər kişi müğənniləri nəzərdə tutmuram. O, hər zaman yeni işlər görür”.

Müğənni klip çəkilişləri zamanı başına gələn hadisələrdən də söz açıb:

“Bu cavan oğlan (red.klipin rejissoru Natiq Muxtarov) təkcə klipdə deyil, həyatda da birdən-birə mənimlə zarafat etmək qərarına gəldi. O, əlini roldan çəkib maşında qaza basdı. Bu kadrda həqiqətən də möhkəm qorxmuşdum”.

Klipdə sevgilisi tərəfindən zarafatla başına min bir oyun açılan müğənni ssenari haqqında fikirləri bölüşüb:

“Burada münasibətlər arasında aqressiyanı yox, yumoru göstərməyə çalışmışıq. Düşünürəm ki, yumor hissi olmayan münasibətlər alınmır. Zatən iki sevgili mütləq şəkildə bir-biri ilə zarafat edir və bu, təbiidir. Əsas odur ki, sevginin sonu evliliklə bitdi. Klipin sonunda evlənmişəm. Ərə getdim. Ümumiyyətlə ərə getməkdən xoşum gəlir. Bizdə belədir, sevdinsə gərək ərə gedəsən. Mən də ərə getmək üçün ölürəm də…"