Mədəniyyət və turizm naziri Əbülfəs Qarayev nəqliyyat naziri olmuş Ziya Məmmədovun aqibətini yaşamaqdadır

Ulus.Az-ın verdiyi məlumata görə, nazirin keçmiş həmkarı kimi səlahiyyətləri getdikcə azaldılır.

Belə ki, Nazirlər Kabineti "Azərbaycan Respublikası Mədəniyyət və Turizm Nazirliyinin strukturuna daxil olmayan tabeliyindəki qurumların Siyahısı”nda dəyişikliklər edib.

Qərara əsasən mədəniyyət və istirahət parkları Mədəniyyət və Turizm Nazirliyinin strukturuna daxil olmayan tabeliyindəki qurumların Siyahısı”ndan çıxarılıb.

Mədəniyyət və istirahət parkları onlara məxsus əmlakla birlikdə ərazi üzrə aidiyyəti yerli icra hakimiyyəti orqanlarının tabeliyinə verilib.

Mədəniyyət və Turizm Nazirliyinə Əmlak Məsələləri Dövlət Komitəsi və ərazi üzrə aidiyyəti yerli icra hakimiyyəti orqanları ilə birlikdə bu qərardan irəli gələn məsələləri həll etmək tapşırılıb.

Bundan qabaq, Mədəniyyət və Turizm Nazirliyinin rayon şöbələri ləğv edilib. Qərara əsasən, rayonlardakı yerli şöbələr faktiki olaraq ləğv edilib, onların rəhbərliyi və əməkdaşları işdən azad olunub.

Ləğv olunmuş şöbələrin əvəzinə, bir neçə rayonun birləşdiyi regional mədəniyyət idarələri yaradılacaq.

İdarənin işçi heyəti isə, ləğv olunmuş şöbələrin birinin işçi personalının sayına bərabər olacaq. Yəni, ləğv olunmuş 4 rayon şöbəsinin əməkdaşlarından, yalnız birində olan qədər işçi heyəti saxlanılacaq.

Ulus.Az-ın verdiyi məlumata görə, Ə.Qarayev Z.Məmmədovun taleyini yaşadığı göz qabağındadır.

Bu gedişlə ya nazirlik ləğv olunacaq ya da başqa bir quruma birləşdiriləcək. Ölkənin neft gəlirlərinin azalması, digər sahələrdən isə gəlirlərin çox aşağı səviyyədə olması dövlətin öz öhdəliklərini yerinə yetirməsində, nəzərdə tutulan xərcləri ödəməsində ciddi problemlər yaratmaqdadır.

Bundan çıxış yolu kimi hazırda Azərbaycan hökuməti dövlət xərclərini azaltmağa çalışır. Dövlət tərəfindən həyata keçirilməsi nəzərdə tutulan bir şox layihələrin artıq təxirə salındığı məlumdur.

Bunun isə ən qısa və hazırkı şəraitdə yeganə yolu ciddi islahatlara getmək, neft gəlirlərinin bol vaxtı şişirdilmiş dövlət aparatını kiçiltmək, kütləvi ixtisarlar aparmaqdır. Və hökumət də buna getmək niyyətindədir.

Bu çərçivədə hökumət artıq bir çox nazirliklərə, dövlət komitələrinə, büdcədən maliyyələşən digər təsisatlara xərclərin azaldılması üçün ştat vahidlərinin ixtisarını nəzərdən keçirmək barədə təlimat göndərib.