Mən əvvəl belə deyildim, elə bil huşsuzlaşmışam... Bu sözləri özünə deyən insanların sayı aramızda elə də az deyil. Hətta kifayət qədərdir də deyə bilərik. Demək ki, yaddaş pozğunluğu günümüzün vəbasına çevrilib. Bu haqda daha ətraflı qarşıdakı materialda...

Mütəmadi olaraq, mütaliə etmək insanın yaddaşını möhkəmlədirən əsas amildir. Əgər həmin mütaliəni biz canlı kitab oxumaqla etsək, nəticə də daha gözəl olar. Amma etiraf edək ki, elektron vasitələr, internet bizə kitab qoxusunu yadlaşdırır. Elə o qoxuyla yanaşı yaddaşımız da yadlaşır.

Müəyyən bir yaş həddinə çatdıqda yaddaşda yaranan pozğunluğu normal hal kimi qəbul etmək olar, amma gənclərdə necə?! Mütəxəssislər gənc yaşda insanlarda yaranan yaddaş pozğunluğunu müxtəlif səbəblərlə izah edirlər.

Səbinə Həsənova- psixoloq: "Əgər hər hanı bir insanın yaddaşı yaxşı idisə, müəyyən vaxtdan sonra əksinə olursa səbəblər müxtəlif ola bilər. İlk növbədə insanın düşdüyü mühit, yaşadığı situasiya, stress, aqressiya...".
Birini də biz əlavə edək. İnternet... Onun sürətli inkişafı nə qədər müsbət halları özündə ehtiva edirsə, bir o qədər də mənfilərə yol açır. O cümlədən sözügedən yaddaş pozğunluğuna. Əgər vaxtilə bizə lazım olan məlumatı yaddaşımızda saxlamaq məcburiyyətində idiksə, bu gün internet həmin məcburiyyəti arxayınlıqla əvəzləyir. Yəni, nə vaxtsa bizə gərək olacaq informasiyanı günlük yoldaşımız internetdən əldə edə bilərik kimi əminliyimiz var. Amma unutmaq olmaz ki, bəlkə də fərqinə varmadan, bizdən asılı olmayan vasitələrə olan həddən artıq əminliyimiz, yaddaşımıza olan əminliyimizi itirir.

http://kepeztv.az