Cəlilabad rayonunda əmisi oğlunu qətlə yetirməkdə təqsirli bilinərək məhkum olunan Şənlik Şükürov Ali Məhkəməyə müraciət edib.
Onun müraciətinə hakim Tahir Kazımovun sədrliyi ilə keçiriləcək məhkəmə iclasında baxılacaq.

Məhkəmə baxış iclası fevralın 5-nə təyin olunub.

Qeyd edək ki, hadisə Cəlilabad rayonunun Xəlilli kəndində baş verib.

Kənd sakini Şənlik Şükürov həyətində münaqişə zəminində əmisi oğlu İxtiyar Şükürovu qətlə yetirib. DİN-in məlumatında qətlin bıçaqla törədildiyi bildirilib. Qeyd edilib ki, Cəlilabad RPŞ əməkdaşlarının həyata keçirdikləri əməliyyat-axtarış tədbirləri nəticəsində Ş.Şükürov tutulub.
Baş Prokurorluq da həmin hadisəyə dair məlumat yayıb. Baş Prokurorluğun məlumatına görə, 1982-ci il təvəllüdlü Cəlilabad rayonunun Xəlilli kənd sakini Şükürov Şənlik Kamal oğlu yaşadığı evin həyətində qısqanclıq zəminində aralarında yaranmış mübahisə zamanı qohumu Şükürov İxtiyar Müzəffər oğlunu özündə olan bıçaqla bədəninin müxtəlif nahiyələrinə, həmçinin mişar daşı ilə isə başına çoxsaylı zərbələr vuraraq qəsdən öldürüb və Cəlilabad rayon Polis Şöbəsinə gələrək törətdiyi cinayət hadisəsi barədə məlumat verib, eyni zamanda cinayətin aləti olan bıçağı təqdim edib.

“Daxil olmuş məlumat əsasında rayon prokurorluğunun əməkdaşları tərəfindən hadisə yeri və meyitə məhkəmə-tibbi ekspertin iştirakı ilə baxış keçirilmiş, hadisə yerindən iş üçün əhəmiyyət kəsb edən maddi sübutlar götürülmüş və digər zəruri istintaq hərəkətləri həyata keçirilmişdir.

Ş.Şükürov şübhəli şəxs qismində dindirilərkən törətdiyi əməli tam etiraf etmişdir.