Bakının Nizami rayonunda cinsi zorakılıq faktı qeydə alınıb.
Bakı şəhər sakini Roman İbrahimov sosial şəbəkələrdən birində Nailə Əliyeva (ad və soyad şərtidir) ilə tanış olub. Bu tanışlıq bir müddət davam etdikdən sonra Roman Nailə ilə real olaraq görüşüb. Sonra isə Nailəni rayon ərazisində yerləşən evlərdən birinə dəvət edib və orada qanunsuz olaraq saxlayıb. Bu müddətdə qadınla dəfələrlə cinsi əlaqədə olub. Daha sonra o, Nailəyə zorakılıq göstərib və həmin evdə qalmasını tələb edib. Nailə onun tələbini yerinə yetirmədiyi halda Roman onun yaxın qohumlarını öldürməklə hədələyib.

Roman Nailəni hədələyən zaman ona silah qismində olan əşyanı nümayiş etdirib. Bu hədələrdən qorxan Nailə həmin evdə qalmağa razı olub.

Nailə evdə qaldığı müddətdə Roman onunla dəfələrlə cinsi əlaqədə olub, digər seksual xarakterli hərəkətlər edib.
İstintaq orqanı tərəfindən Roman İbrahimovun barəsində Cinayət Məcəlləsinin 145.2.6-cı (silahdan yaxud silah kimi istifadə edilən əşyalardan istifadə etməklə qanunsuz azadlıqdan məhrum etmə), 145.2.5-ci (zərərçəkmiş şəxsin həyatı və ya sağlamlığı üçün təhlükəli olan zor tətbiq etməklə qanunsuz azadlıqdan məhrum etmə) və 149.2.4-cü (zərərçəkmiş şəxsi və ya başqa şəxsləri öldürmə və ya sağlamlığa ağır zərər vurma hədəsi ilə, habelə xüsusi amansızlıqla zorlama) maddələri ilə ittiham elan edilib.

Nizami rayon Məhkəməsində hakim Məzahir Sadıqovun sədrliyi ilə baş tutan prosesdə istintaq orqanının Roman İbrahimovun barəsində həbs qətimkan tədbirinin seçilməsi barədə təqdimatına baxılıb.

Hakim təqdimatı təmin edib və Roman İbrahimovun barəsində 3 ay müddətinə həbs qətimkan tədbiri seçilib.