Azərbaycanın yazılı mətbuatı və elektron mediası getdikcə Xoşqədəmin, Zaurun efirinə oxşamağa başlayır

Cahan.info yazır ki, xəbər lentlərini məişət məlumatları bürüyüb.

Ərinə xəyanət edən, evindən qaçan, 7-ci sinif şagirdi ilə evlənən, saçı qırxılan, ərinin əmisi oğlu ilə sevişən adamlar haqda xəbərlər mətbuatı cənginə alıb.

Peşəkar çap mətbuatı və onun şinelindən çıxaraq təcrübəsini elektron KİV-də tətbiq edən jurnalistlər belə bu informasiyalardan qaça bilmirlər, məişət, ailədaxili münaqişə, xəyanət, intihar, qızqaçırma, arvadına sataşana işgəncə verilməsi xəbərlərini baş manşetlərə daşıyırlar.

Çox təəssüf ki, ictimai-siyasi, iqtisadi, xarici siyasət xəbərləri bu məlumatların içindeə əriyirlər. Peşəkar mediada artıq reportaj, müsahibə, təhlil, şərh, ciddi tənqidlər yoxa çıxır. Onun yerini isə əyalətlərdə, kəndlərdə baş verən biabırçı hadisələr, əttökən informasiyalar tutmaqdadır.

KİV isə Zaurun, Xoşqədəmin verilişlərini tənqid edə-edə onların proqramlarına oxşamağa başladılar.

Məsələn, əmisi oğlunun arvadı ilə intim münasibət quran şəxs qohumları tərəfindən cəzalandırılıb. Bu hadisə Şəmkir rayonunda baş verib.

Belə ki, rayonun Seyfəli kənd sakini Həsənov Elşad Yusif oğlu əmisi oğlanları tərəfindən döyülərək təhqir edilib. Xəbəri trend yayıb.

Heç bir etik kodeks gözlənilmir və nəzərə alınmır ki, heç bir araşdırma, məhkəmə qərarı olmadan, istintaq başa çatmamış iki nəfəri ad-soyadı ilə ölkədə, ölkə bir yana kənddə biabır edirlər. Mətbuat bunu etməməlidir axı?!

Xəyanət edən qadının əri dostları ilə birlikdə qardaşının boynundan kəndirlə bağlayaraq işgəncələr verib.

Gənc oğlanı çılpaq vəziyyətdə çöllük sahəyə apararaq döyüblər. Daha sonra onun üzr istəməsini əks etdirən videogörüntülər sosial şəbəkədə paylaşılıb.

"Təmiz Dünya" Qadınlara Yardım İctimai Birliyinin sədri Mehriban Zeynalova modern.az-a deyib ki, boşanmaların sayının artması ölkədə ailə münasibətlərində ciddi böhranın olduğunun göstəricisidir:

Hər ailənin öz problemi var. Rəsmi statistikadan başqa, qeyri-rəsmi nikahda olanlar da var. Yəni vətəndaş nikahı və dini nikahda olub, boşananların sayını biz dədiqləşdirə bilmirik.

Sosial şəbəkələr də burada mühüm rol oynayır. Əksəriyyət başqa adla Facebook-a girir, ər də xəbər tutanda problem yaranır.

Bu gün boşanmaların səbəbi əksər qadınların Facebook, İnstaqram kimi sosial şəbəkələrin istifadəçisi olub, orada öz fotolarını paylaşmaları, yaxud ərindən gizlin telefon işlədib, digər şəxslərlə münasibət qurmaları, mesajlaşmalarıdır. Həmin mesajlar üzə çıxanda da qarşı tərəf çıxış yolunu məhkəmə qapısında tapır.