Saxlanılan şəxs: "Tutmasaydılar, hələ çox oğurluqlar edəcəkdim"

Ömrünün 26 ilini dəmir barmaqlıqlar arasında keçirən Lənkəran sakini cəmi 7 ay azadlıqda yaşaya bildi. Azerinfo.az-ın Kəpəz TV-yə istinadən verdiyi məlumata görə, həmin şəxs Gəncədə nə az, nə çox düz 18 mağazadan oğurluq edib. Polis onun əməlindən zərərçəkənlərin sayının artacağını da istisna etmir.
Lənkəran sakini, 48 yaşlı Xaliq Məmmədov fevralın 3-dən 4-nə keçən gecə Gəncə şəhərində Samir Həbliyevə məxsus mağazadan xeyli miqdarda nəğd pul və tütün məmulatları oğurlayıb. Gəncə şəhər Baş Polis İdarəsinin Nizami Rayon Polis İdarəsinin əməkdaşlarının həyata keçirdikləri əməliyyat - axtarış tədbirləri nəticəsində Xaliq Məmmədov şübhəli şəxs qismində saxlanılıb. Onun ətrafında aparılan araşdırmalar zamanı müəyyən edilib ki, bu, Məmmədovun Gəncədə ilk oğurluq əməli deyil. Buna qədər o, müxtəlif şəxslərə, ümumilikdə 20 min manat maddi ziyan vurub.
Amil Əliyev, müstəntiq: "Lənkəran sakini Məmmədov Xaliq Mahmud oğlu 2014-cü ilin iyul ayından başlayaraq 2015-ci ilin fevral ayınadək şəhərin müxtəlif ərazilərində 18 mağazadan oğurluq edib".
Əvvəllər eyni əmələ görə 5 dəfə məhkum olunan Xaliq Məmmədov ümumilikdə 26 il cəza çəkib. Əməlindən heç də peşman olmayan "qəhrəman" oğurluq üçün yalnız mağaza seçməsini də özünəməxsus şəkildə dəyərləndirib.
Xaliq Məmmədov: "Oğurluq məndə bir xəstəlikdir. Tutmasaydılar, hələ çox oğurluqlar edəcəkdim. Mənim nə qədər pulum olsa da, bu yoldan çəkinə bilmirəm. Yalnız mağazalara ona görə daxil olurdum ki, onların sahibləri camaatı tərəzidə çox aldadırlar".

Faktla bağlı Gəncə şəhər Baş Polis İdarəsində cinayət işi başlanılıb. İstintaq aparılır.