Polisin araşdırması zamanı cinayətin elə həmin məntəqənin işçisi olan Mikayıl Balakişiyev və onun dayısı oğlu tərəfindən törədildiyi müəyyən edilib.

Sabirabad polis şöbəsindən verilən məlumata görə, 19 dekabr 2014-cü il tarixində gecə saat 02:10 radələrində Sabirabad rayon Qaratəpə kəndində avtomobil yolunun kənarında yerləşən Türkədi kənd sakini Nadir Abbasova məxsus "Oskar" Yanacaqdoldurma məntəqəsinə maskalı şəxslər tərəfindən quldur basqını baş verib. Basqın edən şəxslər məntəqənin operatorlarını bıçaqla hədələyərək oradan 1154 manat satış pulunu və 2 ədəd mobil telefonu götürərək aradan çıxıblar. Sabirabad polisi tərəfindən aparılan əməliyyat-axtarış tədbirləri nəticəsində məlum olub ki, adıçəkilən məntəqədə işləyən, əvvəllər məhkum olunan Sabirabad şəhər sakini Mikayıl Balakişiyev dayısı oğlu, Ulacalı kənd sakini Kamal Babayev ilə qabaqcadan əlbir olub qrup təşkil edərək satış pulunu və mobil telefonları ələ keçirmək məqsədi ilə "Oskar" YDM-nə qarəti planlaşdırıblar. İstintaq əməliyyyatları zamanı Mikayıl Balakişiyev dayısı oğlunu istiqamətləndirdiyini və onunla əlbir olduğunu etraf edib. Bundan sonra aparılan əməliyyat tədbirləri nəticəsində Kamal Babayev Bakı şəhərində həbs edilərək istintaqa təhvil verilib. Faktla bağlı Sabirabad polis şöbəsində cinayət işi açılıb, araşdırma aparılır.