Avropa Yenidənqurma və İnkişaf Bankı (AYİB) özünün son Regional İqtisadi Perspektivlər (REP) hesabatında bildirir ki, Ermənistan, Azərbaycan və Gürcüstan iqtisadiyyatları son illərdə ən yüksək artım tempinə malikdirlər.

Hesabatda bildirilir ki, Azərbaycan yüksək enerji qiymətlərilə artan yüksək səviyyəli neft və qaz gəlirlərindən, eyni zamanda qeyri-enerji sektorunun güclü göstəricilərindən istifadə edir.

Həmçinin qeyd edilib ki, Azərbaycan üçün qeyri-müəyyənlik həm enerji qiymətlərindən, həm də inflyasiyadan qaynaqlanır. Bank 2023-cü ildə zəif iqtisadi artım barədə xəbərdarlıq edir. Proqnozlar Ukraynaya qarşı müharibənin şiddətlənəcəyi təqdirdə daha da aşağı risklərə məruz qala bilər. AYİB-nin hesabatında artım tempi yüksək qiymətləndirilsə də, hazırda ölkədə inflyasiya heç də aşağı deyil.

Qarşıdakı ildə ölkənin iqtisadi artım tempinin zəifləyəcəyi nə dərəcədə realdır? DİA.AZ-ın məlumatına görə, iqtisadçı-ekspert Natiq Cəfərli Cebhe.info-ya bildirdi ki, beynəlxalq təşkilatlar, banklar hansısa bir ölkənin ÜDM-si ilə bağlı proqnoz verərkən həmin ölkənin iqtisadiyyatının əsas aparıcı hissəsinin nədən ibarət olduğunu, hansı hadisələrdən təsirləndiyini hesablayırlar:

“Azərbaycanla bağlı hansısa proqnoz əslində ancaq neft-qaz qiymətlərinin gələcək taleyi ilə bağlı proqnozlara uyğunlaşdırılır. Hazırda da iqtisadi artım zəifləyib və dünyada resessiya təhlükəsi var. Resessiya təhlükəsinin olması, iqtisadiyyatın daralması ona gətirib çıxaracaq ki, enerji daşıyıcılarının qiymətində kifayət qədər enmə ola bilər. İndi dünyada belə modellər qurulur. Çünki iqtisadiyyat daralırsa, iqtisadi aktivlik azalırsa, sənaye müəssisələri dayanırsa, iqtisadiyyatının artım tempi bütün dünyada aşağı düşürsə, deməli, bu, neftə tələbatı da azaldacaq. Məsələlərə bu nöqteyi-nəzərdən yanaşırlar. Buna görə beynəlxalq qurumların Azərbaycanla bağlı proqnozlarında bu amil əsas rol oynayacaq”.

Ekspert hesab edir ki, bundan sonra beynəlxlaq təşkilatlar da bənzər açıqlamalarla çıxış edəcək:

“Bütün bunlar da onu sübut edir ki, Azərbaycan iqtisadiyyatı ancaq yeganə bir faktordan, neft və onun qiymətindən asılı vəziyyətdədir”.