Mərkəzi Bankda Dövlət Neft Fondunun iştirakı ilə növbəti valyuta hərracı keçirilib.

Hərracda tələb 30,8 milyon ABŞ dolları təşkil edib və tam təmin edilib. Bu isə daha əvvəl keçirilən hərraclarda dollara olan tələbatdan aşağıdır. Son olaraq 28 Aprel 2022-ci il tarixində keçirilən valyuta hərracında tələb olunan 44 milyon ABŞ dolları tam təmin edilib. Qeyd edək ki, son zamanlarda keçirilən hərraclarda dollara tələbatın azalması diqqət çəkir. Buna müxtəlif səbəblər göstərilir. Hətta quru sərhədlərinin bağlı olması və insanların xaricə gedə bilməməsinin dollara olan tələbatı azaltdığı qeyd olunur.

Maraqlıdır, ölkəmizdə dollara tələbatın azalması nə ilə bağlıdır? Dia.az-ın məlumatına görə, bununla bağlı “Cümhuriyət”ə açıqlamasında iqtisadçı alim Fuad İbrahimov bildirib ki, hərraclarda dollara tələbatın azalması təkcə quru sərhədlərinin bağlı olması və ya turizm faktoru ilə əlaqəli deyil:

“Nəzərə almaq lazımdır ki, ölkənin idxal həcmində və biznes mühitində müəyyən azalmalar var, o cümlədən ticarət dövriyyəsinin ümumi azalması da var. Bunlar hamısı dolayı yolla valyutaya olan tələbatın azalmasına səbəb olur. Üstəlik, bu göstəricilərin özünün şəffalığında belə xəta var. Yəni valyuta satışında müəyyən məhdudiyyətlər yarandığı üçün artıq “qara bazar” formalaşır. Hazırda keçmiş dövrdən fərqli olaraq “qara bazar” sosial şəbəkələrdə dövriyyəni tənzimləyir. Yəni bu gün dollara tələbatın azaldığı görünsə də, həmin yeri məhdudiyyətlər nəticəsində “qara bazar” alıb”.