"Artıq yenidən quruda qazma işlərinə başlanılıb"


Dövlət Neft Şirkəti “Əsrin müqaviləsi”ndə iştirak payını artırmağı nəzərdə tutur.

ANS TV-nin məlumatına görə, bu barədə şirkətin birinci vitse-prezidenti, əfsanəvi neftçi Xoşbəxt Yusifzadə Xəzər Avropa Klubunun keçirdiyi biznes-forumda məlumat verib. Xoşbəxt Yusifzadə yeni yataqların kəşfi üçün avadanlıq çatışmazlığından da söz açıb:

“Faktiki olaraq kəşfiyyat dayanıb. Biz bir çox yataqlarda üzən qazma qurğusunu gözləyirik. Birinci bu hadisənin 2018-ci ildə olunacağı gözlənilir”.

Azərbaycan dənizdə yeni neft yataqları kəşf edilə bilməməsinin səbəb isə odur ki, bu tip yataqların kəşfiyyat işlərini aparmaq üçün avadanlıqlar çatışmır. Əldə olan 3 üzən qazma qurğusunu isə Dövət Neft Şirkəti və BP "Şahdəniz"də istismar edir.

Ölkədə neft hasilatının səviyyəsini stabil saxlamaq üçün Dövlət Neft Şirkəti yeni strateji plan hazırlayıb. Yeni texnologiyalar vasitəsilə tədqiqat işləri quruda və işlənmiş quyularda aparılacaq.

Xoşbəxt Yusifzadə artıq yenidən quruda qazma işlərinə başlanıldığını da açıqladı:

“Bu barədə biz bir sıra xarici şirkətlərlə müqavilələr bağlamışıq. Hazırda orada tədqiqat işləri aparılır ki, gələcəkdə Mezozoy çöküntülərində kəşfiyyat işlərinə başlayaq”.

SOCAR yataqların birgə işlənməsini əvvəlcə köhnə tərəfdaşlarına təklif edəcək. Hazırda isə SOCAR (AÇG)“Azəri-Çıraq-Günəşli” neft-qaz yataqlar blokunun işlənməsi üzrə müqavilədə payını artırmağı düşünür. AÇG blokunun işlənməsi üzrə cari müqavilənin müddəti 2024-cü ilə başa çatacaq və müqavilənın 2040-cı ilədək hətta daha uzun müddət, 2060-cı ilədək uzadılması imkanı istisna edilmir.