Amerika şirkəti Orbital ATK "Azərspace-2" barədə Azərbaycanla razılığa gəlməyib.

ANS PRESS-in məlumatına görə, bu barədə şirkətin vitse-prezidenti Ted Makfarland deyib. Buna səbəb kimi Amerika bankı "Exİm"in maliyyə dəstəyi verməsindən imtina etməsi göstərilir.

ABŞ konqresi "Exİm" bankının böyük layihələrə ayırdığı kreditlərə veto qoyub. Konqres hesab edir ki, bank öz səlahiyyətləri sərhədini aşır və böyük korporasiyaların biznes-maraqlarının müdafiəçisinə çevrilir.
Azərbaycanın milli peyk operatoru "Azərcosmos" tikinti və ikinci peykin işə salınması üçün Orbital ATK-la danışıqlar aparıb. Şirkət "Exİm" bankdan alınmış güzəştli kreditlərin hesabına Azərbaycan peyki tikmək fikrində idi. Bir halda ki, artıq banka kreditlər verməklə bağlı qadağa qoyulub, ona görə də, bu şirkətlə razılaşma pozulub.
"Əslində, biz bankın kredit verməməsi ilə çox şey itirdik. Bizim üzümüzə qapılar bağlandı. Əvvəlcə biz Azərbaycanla razılıq əldə etdik, indi isə itirdik", - deyə Makfarland bildirib.
"Azərkosmos"dan ANS PRESS-ə verilən məlumata görə, şirkət strateji inkişafının genişləndirilməsi məqsədi ilə, 2017-ci ildə ikinci telekommunikasiya peyki "Azerspace-2"ni 45° şərq uzunluğu orbital mövqeyinə çıxarmağı planlaşdırır. Peyk Avropa, Mərkəzi və Cənub-Qərbi Asiya, Yaxın Şərq və Afrika ölkələrini əhatə edəcək. "Azerspace-2" regionda hökumət təşkilatları və şəbəkə xidmətləri sahəsində artmaqda olan tələbləri qarşılamaq üçün yüksək texniki imkanlar, əlverişli əhatə zonası və keyfiyyətli xidmət təklif edəcək. Yeni peyk həm də birinci telekommunikasiya peyki olan "Azerspace-1"in orbitdəki ehtiyatı olacaq və "Azərkosmos"a müştərilərinə daha etibarlı xidmət göstərmək imkanı verəcək. Həmçinin, "Azerspace-2" sayəsində şirkətin əhatə zonası da genişlənəcək.

Bu ilin əvvəli "Azerspace-2" peykinə dair açıq tender elan olundu və dünyanın aparıcı peyk istehsalçıları tərəfindən tenderə böyük maraq var idi. Bunlar sırasında ABŞ-ın Orbital ATK və Space Systems Loral, Çinin China Great Wall Industry Corporation və Fransanın Airbus Defence and Space şirkətləri daxildir.