“Dünya neft bazarında qiymətlərin kəskin düşməsi əsasən siyasi proseslərdən qaynaqlanır. Bu, heç də neft erasının başa çatması anlamına gəlmir, müvəqqəti xarakter daşıyır və dünya nizamında ABŞ-ın siyasi və iqtisadi möveyinin güclənməsinə hesablanıb”.

Bunu Cebhe.info-ya açıqlamasında siyasi şərhçi Məhəmməd Əsədullazadə deyib.

Onun sözlərinə görə, ABŞ-ın iqtisadiyyatı neft gəlirlərindən asılı olmadığı üçün hazırkı mərhələdə Vaşinqton Rusiyanın iqtisadiyyatına ciddi və ölümcül zərbə vurmaqdadır. Həmçinin İran və Venesuelanın iqtisadi kollaps yaşamasını reallaşdırır:

“Koronavirus pandemiyası və neft qiymətlərinin kəskin enişi neft ixrac edən ölkələr üçün əsl kabusdur. Bu bir daha sübut etdi ki, təkcə neft sektorunu inkişaf etdirmək risklidi və özü ilə siyasi problemlərə yol aça bilər. Çünki hər bir ölkənin iqtisadi dayanıqlığı onun siyasi sabitliyinin qarantıdır. Uzun illərdir ki, neft gəlirlərindən asılı olan bir ölkə qeyri-neft sektonu inkişaf etdirməməklə, hazırkı mərhələdə çox ciddi sınaqlarla üzləşir və dünyada bu tendensiya uzun müddət davam edəcək. Neftin daha 100 dollar civarında satılacağı individualdır.

Ölkəmizin qeyri-neft sektorunun inkişaf etdirilməsi və bu sahəyə ayrılan milyardlarla dollar təəssüf ki, öz müsbət nəticəsini vermədi. Ayrılan vəsait korrupsiyaya bulaşdı və ayrı-ayrı məmurlar tərəfindən mənimsənildi.

Artıq proses elə vəziyyətə gəlib çıxdı ki, dövlət başıçısı İlham Əliyev də açıq şəkildə yüksək çinli məmurların bu çirkin əməllərini tənqid etdi.

Artıq liberal iqtisadiyyat və monopoliyanın qaldırılması istiqamətində ciddi islahatlara ehtiyac var. Məhz dövlət başçısı İlham Əliyev də bu istiqamətə nəzarət mexanizmini həyata keçirir. Hökumətin mobil və çevik sürətdə iqtisadi və siyasi islahatlara getməsini nəzərə alaraq ölkəmizin iqtisadi dayanıqlığını təmin etmək olar. Koronavirus və neft qiymətlərinin kəskin düşməsi bir aydan sonra iqtisadiyyatımıza mənfi təsir edəcək. Ona görə də ciddi şəkildə, yalnız islahatlarla bu böhranı önləmək olar”.

Politoloq qeyd edib ki, Azərbaycan müharibə şəraitindədir və milyardlarla dollar məbləğində silah alışı həyaya keçirir. Neft qiymətlərində kəskin eniş və digər sahələrin inkişaf etdirilməməsi bizim üçün çətin bir dönəm olacaq:

“Silahlanma bizim üçün ən başlıca prioritetdi. Bizə heç kim aşağı qiymətlə və havayı silah verməyəcək. Ona görə də silahlanma üçün vəsait yetərli olmalıdır və Ermənistana sevinmək üçün əsas verməməliyik.

Qeyd edim ki, AXCP sədri, millət vəkili Razi Nurullayev daima qeyri-neft sektonun inkişaf etdirilməsini vurğulayıb. Partiyanın bu istiqamətdə təklifləri hökumətə təqdim olunub və bu təkliflərin bəzilərinin həyata keçirilməsi baş tutub. Bir neçə ildir ki, verilən siyasi-iqtisadi təkliflər bu gün üçün idi. Hazırda millət vəkili Razi Nurullayev parlamentdə bu istiqamətdə çalışaraq xalqın və dövlətin maraqlarını əks etdirən təkliflərini irəli sürür”.