Azərbaycan Mərkəzi Bankı ipoteka kreditlərində gözlənilən yeniliklərin detallarını açıqlayıb

Azerinfo.az-ın ANS TV-yə istinadən məlumatına görə, Mərkəzi Bankın sədri Elman Rüstəmov ilin sonuna qədər dövlət büdcəsindən ipoteka üçün ayrılan vəsaitin 250 milyon manata çatacağını bildirib. Vəsaitlərin bir qismi sosial, bir qismi isə kommersiya ipotekasına yönəldiləcək. Bankir bildirib ki, həmin vəsaitlər kommersiya banklarına Mərkəzi Bank ayıracaq, amma buna Maliyyə Nazirliyi dövlət zəmanəti verəcək. Gələn il isə ipotekaya daha böyük vəsatin ayrılması nəzərdə tutulur.

Əsas dəyişikliklər isə ipoteka kreditlərinin özündə baş verəcək – belə ki, həm sosial, həm də kommersiya ipotekası üzrə faizlər aşağı salınacaq, məbləğlər isə artırılacaq: “Həmişə şikayətlər var idi ki, faiz dərəcələri yuxarıdır. Bizim təklifimizdə həm kommersiya ipotekasının, həm də sosial ipotekanın şərtlərinin (faizlərinin) aşağı salınması nəzərdə tutulur. Həm sosial, həm də kommersiya ipoteksaı üzrə ayrılan kredit məbləğləri aşağı idi. Bu, ancaq təkrar bazardan, köhnə mənzil fondundan mənzillərin alınmasına imkan verirdi. Bunu nəzərə alaraq təxminən hər iki istiqamət üzrə (sosial və kommersiya) məbləğlərin iki dəfə artırılmasını nəzərdə tuturuq” - deyə AMB rəhbəri bildirib.