Uzun illər "Azərneftyağ" neft emalı zavodunun idarəetmə aparatında çalışmış bir neçə işçi redaksiyamıza müraciət edib. Azerinfo.az bildirir ki, DİA.AZ-a danışan neftçilər bildirir ki, bu zavod ləğv olunub və Bakı Neft Emalı Zavoduna birləşdirilib: “Bu vaxta qədər ixtisar xəbərdarlığından yalnız zavodun fəhlələri təşvişə düşürdü. İndi idarəetmə aparatında çalışanlar da narahatdır. Belə ki, Dövlət Neft Şirkətindən ixtisar xəbərdarlığı almışıq”.

Bildirək ki, ixtisar xəbərdarlığı alan işçilər artıq 2 ay ərzində 389 nəfərin iş yerini itirəsəyindən də məlumatlıdırlar. Onların dia.az-a bildirdiyinə görə, rəhbərlik onlara yeni iş yeri vəd etsə də, neft böhranını səbəb kimi gətirərək birdəfəlik olaraq iş yerlərini itirəcəklərini açıq şəkildə deyiblər. Maraqlı orasıdır ki, burada da seçim var. Bunu da işçilər deyir: “Kim Bakı Neft Emalı Zavoduna az maaşla aşağı vəzifədə işləməyə razılaşsa, o qalacaq. Kim razılaşmasa, bu başdan başına çarə qılsın. İşçilərsə deyirlər kim razı olar ki, burada şöbə müdiri işləyəndən sonra gedib orada yer süpürsün?”

Neftçilərin işlə bağlı gələcək taleyi sual altındadır. Himayəsində azyaşlılar, qocalar, əlillər olan işçilər daha çox narahatdır. Onlar bu barədə narahatlıqlarını DİA.AZ-a bildiriblər: "Məsələn, aramızda eləsi var ki, təqaüd yaşına az qalıb və ona iş verən də tapılmaz. Belə çıxır ki, neftçi təqaüd yaşına çatanadək hava ilə dolanmalıdır..." İşçiləri narahat edən digər məsələ odur ki, onlara apreldə işsiz qalacaqları barədə xəbərdar edilsələr də kompensasiya vəd olunmur.

Qeyd edək ki, ARDNŞ-in 24 dekabr, 2014-cü il tarixli əmri ilə "Azərneftyağ" neft emalı zavodunun 1 yanvar, 2015-ci il tarixdən Heydər Əliyev adına Bakı Neft Emalı Zavoduna qoşulmaqla fəaliyyətinə xitam verilib.

Ötən ilin sonunda şirkətin rejim və informasiya texnologiyaları üzrə vitse-prezidenti Xalik Məmmədov bu barədə danışarkən bildirmişdi ki, böyük ixtisarlar nəzərdə tutulmayıb.

Onun sözlərinə görə, ixtisarlar "Azərneftyağ"da çalışan fəhlələrə şamil edilməyəcək. Fəhlələr Bakı Neft Emalı Zavoduna köçürüləcək. "Azərneftyağ"da və Bakı Neft Emalı zavodunda ayrı-ayrılıqda 198 rəhbər şəxs var. İxtisarlar onların arasında aparılacaq. Mirvari Qəhrəmanlının sözlərinə görə, iki zavodun birləşməsi ilə bağlı yeni ştat cədvəli hazırlanır: "Təbii ki, ixtisara düşənlər olacaq. Yeni tərkib üçün hər iki zavodun peşə bilikləri yoxlanılacaq. Ən yüksək bal toplayan işlə təmin olunacaq. İşçilər arasında müxtəlif banklardan kredit alanlar da var. Sexlər köçürülməyəcək. Elə "Azərneftyağ"ın ərazisində qalacaq".