Samux rayonunda əkin sahələrinin artırılması və əhalinin münbit torpaqlardan istfadə etməsi istiqamətində aidiyyatı qurumlar tərəfindən aparılan işlər davam etdirilir. Əsas məqsəd aqrar rayon olan Samuxda əkinə yararlı torpaq sahələrini daha da artırmaqdır.

Samuxda əhalinin məşğuliyyətinin əsasən heyvandarlıq və əkinçilik olması bu rayonda aqrar sahənin inkişafını labüd edir. Bu istiqamətdə də əhalinin rahat əkib becərmələri üçün lazımi tədbirlər davam etdirilir. Məsələ burasındadır ki, rayonda taxılçılıq sahəsinin inkişaf etdirilməsi məqsədi ilə 5 min ha yaxın torpaq sahəsinin təyinatı dəyişdirilib və bu sahələrdə dənli bitkilər əkilib.
Fazil Tağıyev- Dövlət Torpaq Xəritəçəkmə Komitəsinin Samux rayon şöbəsinin müdiri: "Son vaxtlar rayonda iri taxılçılıq təsərrüfatının yaradılması ilə əlaqədar olaraq biz də öz imkanlarımızı ortaya qoymuşuq. Beş min ha torpaq sahəsinin təyinatını dəyişib əkinçilik dövriyyəsinə keçirməklə iri taxılçılıq təsərrüfatının yaradılması nəzərdə tutulub ki, buradan da 40-50 sentner məhsul götürülərsə də hesablamalar göstərir ki, Samux rayonun ərzaq təminatında ən yaxşı nəticələrdən birini verəcək".

Taxılçılıqla yanaşı son bir il ərzində qarğıdalı, eləcə də şəkər çuğunduru və digər bitkilər də əkilib. Yeni il üçün ən önəmli yeniliklərdən biri isə Samuxda üzümçülük sahəsinin daha da inkişaf etdirilməsidir. Başqa sözlə desək üzümçülüklə məşğul olan fermerlər birləşərək kooperativlər yaradıblar ki, bu kooperativlərin fəaliyyəti üçün də əlavə torpaq sahələri ayrılıb.

Fazil Tağıyev- Dövlət Torpaq Xəritəçəkmə Komitəsinin Samux rayon şöbəsinin müdiri: "Rayonumuzda 1150 ha sahədə müasir standartlara cavab verən yeni üzümçülük sahəsi yaradılıb. Poylu kəndi ərazisində 60 ailə birləşərək kooperativ təşkil edilib və orada 150 ha sahədə üzüm sahəsi və meyvə bağı salınıb. Hazırda orada geniş şəkildə üzümçülüyün istehsalı ilə məşğuldurlar".

Son bir ildə torpaqlardan təyinatı üzrə istifadəyə gəlincə bu sahəyə də diqqət artırılıb. Əkin sahəsi üçün nəzərdə tutulan torpaq sahələrində ancaq yüngül konstruksiyalı tikililərə icazə verilib.

kepeztv.az