Bakıda budo döyüş növləri üzrə uşaq, yeniyetmə, gənc və böyüklər arasında 7-ci Azərbaycan çempionatı keçirilib. Həm oğlan, həm qız budoçuların qüvvəsini sınadığı yarışda Gəncədən Uşaq Gənclər Fiziki Hazırlıq Klubunun üzvləri iştirak edib.

Hövsan Olimpiya İdman Kompleksində düzənlənən ölkə birinciliyinə 40 klubdan 400-ə yaxın idmançı qatılıb. Nizami yurdundan paytaxta məşqçi Anar Məmmədovun rəhbərliyi ilə 30 budoçu yollanıb. Onlardan 22-si mükafatçılar sırasına düşə bilib. Yeniyetmələr arasında 20 kq-da Rəsul Tağızadə, 25-də Fərda Həsənov, 30-da Elcan Cəfərov, 40 kq-da Rəşad Hüseynov, 45-də Rüzgar İbişov qızıl, 30 kq-da Murad Tağızadə, 55-də Rəşad Qasımov, 60-da Malik Abbasov gümüş, 25 kq çəkidə Nihad Məcidov, 30-da Hikmət Hüseynov, 50-də Elmar Əlizadə və 55 kq-da Sabir Verdiyev bürünc medala sahib olub.

Gənc budoçuların mübarizəsində 55 kq-da Vüqar Hacıyev, 60-da Zaur Məmmədov, 75-də Elşən Nuriyev baş mükafata yiyələnib. 55 kq-da Oktay Dilsuzlu və 65-də Elvin Xəlilov ikinci, 75 kq-da çəkidə çıxış edən Ayxan Bayramov yarışı üçüncü sırada tamamlayıb. Kişilərin mübarizəsində isə yeganə mükafatçı olan Kamil Məmmədov fəxri kürsünün ilk pilləsinə yüksəlib.

İdman klubunun zərif budoçuları da yarışda iştirak edib. 55 kq-da Nərmin Mustafayeva, 60-da Günay Səpxanova və 65-də Nərmin Cəfərli bütün rəqiblərini qabaqlamağı bacarıb.

Yetirmələrinin müxtəlif versiyalarda çıxış etdiyini söyləyən məşqçi Anar Məmmədov nəticənin qənaətbəxş olduğunu deyib.

İdman klubunun yetirmələrini qarşıda beynəlxalq yarış gözləyir. İdmançılar martın sonlarında Moldovada baş tutacaq avropa çempionatına qatışlacaq.

kepeztv.az