Topaz Premyer Liqasının sonuna 5 tur qalmış mükafatlardan yalnız bürünc uğrunda mübarizə maraq kəsb edir. Apasport.az saytının məlumatına görə, “Qarabağ” qızıl, “Zirə” gümüş medalın bir addımlığında olduğundan, “İnter”, “Kəpəz” və “Qəbələ” 3-cü yer uğrunda mübarizə aparır.
Ən pis halda – möcüzə baş versə, “Qızıl oyun”a çıxacaq Ağdam klubu ən yaxın izləyicisini 12 xal qabaqlayır. Artıq həftəsonu çempionluğunu rəsmiləşdirəcəyi gözlənilən Qurban Qurbanovun yetirmələrinin möcüzəyə imkan verməsi mümkünsüz görünür. “Zirə”nin də 3-cü pilləyə şərik olan “üçlük”lə 11 xallıq fərqi 5 turda əldən verməsinə o qədər də inandırıcı deyil.

Bu isə o deməkdi ki, liderdən 23, 2-ci yerdən 11 xal geridə qalan, 6-cı pilləni 7 xal qabaqlayan “İnter”, “Kəpəz” və “Qəbələ” məhz öz aralarında mübarizə aparıb, bürünc mükafatın sahibini müəyyənləşdirəcək. Təbii ki, zirəlilər sensasiyalı şəkildə üstünlüyü əldən verməsə.
Bu üç komandanın qarşıdakı oyunlarına baxsaq, ən çətin təqvim “Qəbələ”dədi. Amma öz taleyi əlində olan yeganə iddiaçı elə məhz Roman Qriqorçukun yetirmələridi.
Çünki hazırda 5-ci olan “qırmızı-qaralar” qarşıdakı 5 oyunun hamısında qalib gəlsə, “İnter”lə “Kəpəz”i arxada qoyacaq. Sonuncuları XXXVI turda məğlub etməklə, şəriklikdən çıxaracaq və şəxsi oyunlarda “bankirlər”dən öndə qərarlaşacaq. Əyalət klubu yalnız hər üç komandanın və ya “Kəpəz”lə eyni xala malik olmaq sərf eləmir. Lakin 5 qələbə bunlara imkan vermir.
Hərçənd, “Qəbələ” üçün təqvim yetərincə ağırdı. Son vaxtlar evdə uda bilmədiyi “Neftçi”ni qəbul etdikdən sonra “Qarabağ” və “Zirə” ilə iki çətin oyun “qırmızı-qaralar” üçün çox əhəmiyyətlidi. Ağdamlılar ya çempion kimi ilk matçına çıxacaq ya da bu titulu rəsmiləşdirmək üçün qəbələlilərlə görüşəcək. “Neftçi” ilə VI yer uğrunda mübarizə aparan AZAL-la ev oyunu da asan olmayacaq. Mövsümü Gəncədə başa vuracaq Qriqorçukun yetirmələri daha bir ağır matçla bürüncün taleyinə aydınlıq gətirəcək.
Bütün oyunları, o cümlədən “Qəbələ”ni yensə belə, 3-cü olmaq üçün “İnter”in büdrəməsinə ümid etməlidi. Əslində, qərblilər üçün təqvim yetərincə yüngüldü. Ardıcıl iki oyunda autsayderlərlə - “Xəzər Lənkəran” və “Rəvan”la üz-üzə gələcək gəncəlilər Premyer Liqada qalmaq üçün meydanda can qoyacaq rəqiblərinin müqavimətini qırmalıdı. Əzəli rəqib olan “Neftçi” ilə matçın evdə keçirilməsi, öz meydanında uduzmayan “Zirə” ilə görüşün XXXV tura təsadüf etməsi də qərblilərin lehinədi. Çünki həmin görüşədək debütant “gümüş”ü rəsmiləşdirə bilər. Son turun “bürünc oyunu” da evdə baş tutacağından gəncəlilər finişə nikbin baxa bilər.
3-cü yer uğrunda mübarizədə ən asan təqvimin “İnter”də olduğunu desək, yanılmarıq. Əslində, bakılılarla “Kəpəz”in qarşılaşacağı 5 komandadan dördü eynidi. “Bankirlər” də “Xəzər Lənkəran”la “Rəvan”dan ibarət autsayder cütlüyü ilə, ən pis mövsümünü keçirən “Neftçi”, həmçinin qazanacağı medalı son turadək müəyyənləşdirəcək “Zirə” ilə üz-üzə gələcək. Amma “Qəbələ” ilə əyani dueli qalan qərblilərdən fərqli, onlar “Sumqayıt”ı da sınağa çəkəcək. Bütün rəqiblərini yenəcəyi halda, “İnter” “Qəbələ”nin xal itkisinə ümid etməlidi.
Bütün bu bürünc hesabını “Zirə”nin gözlənilməz enişi poza bilər. 31 turda cəmi 5 dəfə uduzan paytaxt təmsilçisi finişdəki 5 qarşılaşmada 3 və ya daha çox yenilgiyə üzülüb, 6-dan az xal əldə etsə, bəhs etdiyimiz “üçlük” üçün nəzəri gümüş ümidi yaranır. Amma bunun üçün onlar da maksimal nəticə göstərməlidi.
Əslində, debütantın da təqvimi yaxşı deyil. Bu komandaların üçü ilə də qarşılaşacaq Adil Şükürovun yetirmələri “Qarabağ”la da oynayacaq. Yalnız AZAL-la matç nisbətən asan sayıla bilər.

“Qəbələ”nin son 5 oyunu

1 may (bazar)

157. “Qəbələ” – “Neftçi”

11 may (çərşənbə)

166. “Qarabağ” – “Qəbələ”

7 may (şənbə)

165. “Zirə” – “Qəbələ”

15 may (bazar)

175. “Qəbələ” – AZAL

21 may (şənbə)

177. “Kəpəz” – “Qəbələ”

“Kəpəz”in son 5 oyunu

1 may (bazar)

159. “Kəpəz” – “Rəvan”

7 may (şənbə)

163. “Xəzər Lənkəran” – “Kəpəz”

11 may (çərşənbə)

168. “Kəpəz” – “Neftçi”

15 may (bazar)

174. “Zirə” – “Kəpəz”

21 may (şənbə)

177. “Kəpəz” – “Qəbələ”

“İnter”in son 5 oyunu

1 may (bazar)

160. “İnter” – “Sumqayıt”

7 may (şənbə)

162. “Rəvan” – “İnter”

11 may (çərşənbə)

169. “İnter” – “Xəzər Lənkəran”

15 may (bazar)

173. “Neftçi” – “İnter”

21 may (şənbə)

178. “İnter” – “Zirə”