Son oyun günündə də iki qarşılaşma keçirilib. Günün ən çox maraq kəsb edən görüşündə Bavariya Alians Arenada “Yuventus”la münasibətlərinə aydınlıq gətirib. 5-ci dəqiqədə turinlilər erkən qola sevinib. Pol Poqba müdafiədəki səhvi bağışlamayıb. Meydan sahibləri 28-ci dəqiqədə ikinci topu qapısından çıxarmalı olub. Bu dəfə Kuadrado diqqət mərkəzinə düşüb. İkinci yarıda hesabı xeyirlərinə dəyişmək istəyən almanlar bu qollardan birinin əvəzini 73-cü dəqiqədə çıxıblar. Robert Levandovski cərimə meydançasına göndərilən asmanı başıyla çərçivədən keçirib. Qarşılaşmanı uzatma dəqiqələrinə daşımaq üçün alman təmsilçisinə 1 qol da lazım olub ki, bunu da oyunun əsas vaxtına artırılan 1-ci dəqiqədə Müller vurub. Belədə iki oyunun nəticəsinə əsasən hesab 4:4 olduğundan qalibi müəyyənləşdirmək üçün iki 15 dəqiqəlik əlavə hissəyə ehtiyac duyulub. Burada isə “Bavariya 2” dəfə rəqib qapısına yol tapıb. 109-cu dəqiqədə Alkantara adını tabloya yazdırıb. 1 dəqiqədə sonra isə Koman fərqlənərək komandasına 4:2 hesabıyla qələbə qazandırıb. İki oyunun cəminə görə 6:4 hesabıyla qalib gələn Bavariya 1/4 finala vəsiqə qazanıb.
Gecənin digər oyununda isə "Barselona" sürprizə imkan verməyib. İlk görüşdə səfərdə "Arsenal"a 2 cavabsız qolla qalib gələn katalonlar "Kamp Nou"da keçirilən qarşılaşmada da hesabı açan tərəf olub. 18-ci dəqiqədə Neymar Luis Suaresin ötürməsini qola çevirib. Bərabərlik qolu axtarışında olan ingilislər yalnız 51-ci dəqiqədə öz istəklərinə çata biliblər. Muhammed El Nenni baxımlı vuruşla tablodakı rəqəmləri eyniləşdirib. Ancaq Arsen Venqerin komandası məğlubiyyətdən qaça bilməyib. 65-ci dəqiqədə Luis Suares qayçıvari zərbə ilə fərqlənərək səviyyəsini növbəti dəfə nümayiş etdirib. Lakin qarşılaşma "trio"nun digər üzvü - Lionel Messi üçün də boş keçməyib. Oyunun son anlarında aşırma zərbə ilə adından söz etdirən argentinalı forvard "Barsa”nın 3-1 hesablı qələbəsində pay sahibi olub.

16 mart

Çempionlar Liqası, 1/8 finalın cavab oyunları

23:45."Barselona" (İspaniya) - "Arsenal" (İngiltərə) - 3:1
Qollar: Neymar, 18 (1:0), Elneni, 51 (1:1), Suarez, 65 (2:1), Messi, 88 (3:1)
İlk oyun - 2:0

23:45."Bavariya" (Almaniya) - "Yuventus" (İtaliya) - 4:2
Qollar: Poqba, 5 (0:1), Kuadrado, 28 (0:2), Levandovski, 73 (1:2), Müller, 90+1 (2:2), Alkantara, 108 (3:2), Koman, 110 (4:2)
İlk oyun - 2:2

kepeztv.az