Siyəzən polisi rayonda silsilə oğurluqlar törədən şəxsin qolunu qandallamağa nail olub. Siyəzən şəhərində bir sıra iaşə obyektlərindən elektrik avadanlıqları oğurlayaraq satan rayon sakini həbs edilib. Əvvəllər də eyni əməllərinə görə, bir neçə ilini dəmir barmaqlıqlar arxasına keçirən İlkin Bəylərovun idmançı olduğu bildirilir.

Siyəzən rayon Polis Şöbəsinin Növbətçi Hissəsinə 3 nəfər rayon sakini müraciət edərək fevral ayı ərzində onlara məxsus iaşə obyektlərindən oğurluq edilməsi ilə bağlı məlumat verib. Hadisə yerlərinə baxış keçirən polis əməkdaşları Heydər Əliyev küçəsində yerləşən çayxanadan 1 monitorun, yaxınlıqda yerləşən mağazadan 80 manat pul, 110 manat dəyərində malların, həmçinin Xətai küçəsində yerləşən restorandan 2 ədəd monitorun və peyk qəbuledici aparatın oğurlandığını müəyyənləşdirib. Dərhal əməliyyat-axtarış tədbirlərinə başlayan polis hər 3 hadisənin 29 yaşlı Siyəzən sakini İlkin Novruz oğlu Bəylərov tərəfindən törədildiyini müəyyənləşdirib. O, saxlanılaraq istintaqa təhvil verilib.

İlkin Bəylərovun oğurladığı 3 ədəd monitoru və peyk qəbuledici aparatı Siyəzən şəhərində müxtəlif şəxslərə satdığı məlum olub. Həmin əşyalar polis tərəfindən götürülüb. Bu, idmançı olan İlkin Bəylərovun ikinci məhkumluğu olacaq. Faktla bağlı cinayət işi açılıb, istintaq araşdırmaları davam etdirilir.

http://kepeztv.az