Qarabağdakı separatçılar tam ümidsizlik içindədirlər. Brüssel görüşündən sonra isə bu ümidsizlikləri daha da artıb. DİA.AZ JAMAZ.İNFO-ya istinadla xəbər verir ki, əvvəllər separatçılar bu fikirləri bir o qədər dilə gətirmirdilər. Lakin son günlər ümidsiz olduqlarını nəinki dilə gətirir, bunu açıq şəkildə tirajlayırlar da.

Məsələn, Qarabağda özünü “deputat” adlandıran Metakse Akopyan deyir ki, Brüssel görüşündən hər hansı möcüzə gözləmirdi. “Nə edə bilərik? Tezliklə biz bu gün müzakirə olunan bütün bəndlərin həyata keçirilməsini görəcəyik. Gözləməkdən başqa çarəmiz də yoxdur”.

Akopyan üçtərəfli görüşdən sonra verilən bəyanatdan qəribə nəticə də çıxarıb. O deyir ki, Qarabağa status Azərbaycanın tərkibində veriləcək. “Ola bilər ki, bu muxtar vilayət kimi olsun. Həmin bəyanatdan belə başa düşürəm ki, Qarabağdakı ermənilər Azərbaycandakı digər etnik qruplar kimi yaşamalı olacaqlar. Nikol Paşinyan Ermənistanı və Qarabağı məhvə aparır”.

Separatçıların nümayəndəsi sərhədlərin müəyyən edilməsi prosesində dəstək verən ölkə və həmin işçi qrupunda iştirak edənlərin kimliyini vacib hesab edir. “Bir qədər əvvəl Rusiya Xarici İşlər Nazirliyinin rəsmi nümayəndəsi Mariya Zaxarova bəyan etmişdi ki, Rusiya öz ekspert qrupunu təqdim etməyə hazırdır. Bu qrup artıq mövcuddur. Başqa bir Avropa ölkəsi bu məsələdə öz dəstəyini ifadə edə bilər. Ancaq bütün bunlara getməli olsaq, ekspert qruplarının hansı ölkədən olacağı çox önəmlidir”.

Akopyan Laçın dəhlizinə alternative yolun sürətlə inşası məsələsindən də narahat olduğunu dilə gətirib. O deyib ki, Azərbaycan tərəfi yolun inşasını çox sürətlə aparır. “Yaxın gələcəkdə Laçın və Ağvan Azərbaycanın nəzarətində olacaq. Bunu İlham Əliyevin bəyanatından da görmək mümkündür. Bu məsələ şifahi olaraq razılaşdırılıb”.

Erməni “siyasətçi” ümidini Fransaya bağladığını da deyib. O bildirib ki, Paris onlara kömək edə bilər. “Mən bilmirəm, biz gələcəkdə o ağrılı nəticələri aradan qaldıra biləcəyik, ya yox. Yeganə ümid odur ki, Fransa Ermənistanı və Qarabağın xeyrinə addım atacaq. Çünki müharibə zamanı o ölkədən dostluq çağırışları və hərəkətlər olub. Ümid edirəm ki, Fransa Azərbaycanın can atdığı hərəkətlərin həyata keçirilməsinə imkan verməyəcək”.

P.S. Akopyanlar, Harutyunyanlar hələ də anlamaq istəmirlər ki, onların arzuları heç zaman çin olmayacaq. Çünki Qarabağın Azərbaycanın tərkib hissəsi olduğunu artıq dünya da qəbul edib. 44 günlük müharibə isə bunu bird aha təsdiqləyib. Bundan sonra Qarabağ ermənilərinin iki yolu qalır. Birinci yol, Azərbaycan vətəndaşlığını qəbul edib, digər xalqlar kimi, ölkədə yaşamaqdır. İkincisi isə bu təklifi qəbul etməyib, ölkəmizin ərazisini tərk etmələridir. Seçim özlərinindir. Nə Fransa, nə Rusiya, nə də digər ölkələrdən mədət ummağı da dayandırsınlar. Çünki bunu heç bir faydası olmayacaq.