Azərbaycan Respublikasının Qarabağ torpaqlarındakı Rusiya hərbi kontingentinin himayəsində bəslənən separatçı-terrorçu rejimin rəhbəri Arayik Arutyunyan yenidən oyuncaq “prezident”liyə namizədliyini irəli sürməmək qərarına gəlib. Moderator.az xəbər verir ki, bunu Ermənistanın “Hraparak” qəzeti yazıb.

Erməni nəşri yazır ki, hazırda "DQR"-də "konstitusiya islahatı" hazırlanır. Onun məqsədi “prezident”in istefası zamanı "dövlət" aparatının fasiləsiz fəaliyyətini təmin etməkdir. Bundan sonra 2023-cü ilin əvvəlində "parlament", daha sonra isə "prezident" seçkilərinin keçirilməsi nəzərdə tutulur.

Namizədlər "parlament"də səs çoxluğu olan siyasi qüvvələr tərəfindən irəli sürüləcək. Bunlar, ilk növbədə “Daşnaksütyun” "partiya"sı, keçmiş rejim başçıları: Arkadi Qukasyan, Bako Saakyanla bağlı olan siyasi şəxs və qüvvələr və Arayik Arutyunyanın “Azad Vətən” “partiya”sıdır.

“Namizədlər sülhməramlıları Qarabağda olan Rusiya tərəfi ilə də razılaşdırılacaq”- erməni nəşri belə yazır.

Zəruri şərh:

Sözsüz ki, Arayikin bir daha namizədliyini irəli sürməməsi nə onun özünün, nə də İrəvanın -Paşinyanın qərarıdır... Namizədlərin birbaşa “sülhməramlıları Qarabağda olan Rusiya tərəfi ilə də razılaşdırılacağı” etiraf edilirsə, sözsüz ki, bu, Kremlin – Putinin ssenarisidir... ... XIX əsrin sonlarından bəri Türkiyəyə, Azərbaycana qarşı terrorçuluq, işğalçılıq, soyqırımı siyasətinin əsas banilərindən olan "Daşnaksütyun"un Qarabağda Rusiyanın himayəsi ilə hansı revanşist işləri başladacağı da bəllidir. Hazırlaşaq, yoxsa, sadəcə, gözləyək?..